एनजिओलाई पुर्ननिर्माण जिम्मा दिएको भन्दै काँग्रेसको बिरोध

Posted on: June 14, 2016 | views: 301

३२ जेठ, काठमाडौं ।
प्रमुख प्रितिपक्षि दल नेपाली काँग्रेसले सरकारले पक्षपात रुपमा दल निकटका गैरसरकारी संस्थालाई राष्ट्रिय पुनःनिर्माण प्राधिकरणका महत्वपूर्ण जिम्मेवारी सुम्पिएको आरोप लगाएको छ ।

भूकम्पपछिको पुनःनिर्माणमा भएको ढिलासुस्ती र अनियमितताका बारेमा छलफल गर्न काँग्रेसले काठमाडौंमा आयोजना गरेको भूकम्प प्रभावित १९ जिल्लाका सभापति, सांसद र केन्द्रीय सदस्यको भेलाले सरकारले आफ्नो दल निकटका व्यक्तिलाई खोजी खोजी राहत दिने र अन्यलाई बेवास्ता गरेको निष्कर्ष निकालेको हो ।

त्यस क्रममा सभापति शेरबहादुर देउवाले सरकारले जनतालाई झुक्याएका विषयहरुबारे जनस्तरमा जानकारी गराउनु आवश्यक रहेको बताउनु भयो । उहाँले बजेट र भूकम्पको पुनःनिर्माणका नाममा कार्यकर्ता पोस्ने र देशलाई घाटा पार्ने काम हुन नदिन स्थानीय स्तरमा सक्रियता देखाउन निर्देशन दिनु भएको नेताहरुले जानकारी दिनु भयो ।

नेता महेश आचार्यले भोलिदेखि चल्ने संसद बैठकमा उठाउने विषयबारे पनि बैठकमा छलफल भएको जानकारी दिनु भयो ।