प्रचण्ड नयाँ शक्तिको पार्टी घोषणामा नजाने

Posted on: June 12, 2016 | views: 452


काठमाडौं,जेठ ३० । पूर्वप्रधानमन्त्री डा. बाबुराम भट्टराई संयोजक रहेको नयाँ शक्ति नेपालको पार्टी स्थापना दिवसमा नेकपा माओवादी केन्द्रका अध्यक्ष पुष्पकमल दाहाल (प्रचण्ड) नजाने भएका छन् । नयाँ शक्ति नेपालका संयोजक डा. बाबुराम भट्टराईले पार्टी स्थापना घोषणा सभामा उपस्थित हुन प्रचण्डलाई निमन्त्रण दिए पनि प्रचण्ड नजाने भएका हुन् । प्रचण्ड सचिवालयले अध्यक्ष प्रचण्ड पार्टीको आन्तरिक प्रशिक्षण तथा कार्यक्रमको सिलसिलामा सुदुरपश्चिमको धनगढी पुगेको बताउँदै नयाँ शक्ति घोषणा सभामा जान नसक्ने पुष्टि गरे ।


जेठ ३० गते एक लाख कार्यकर्ताको उपस्थितीमा घोषणा गर्न लागेको नयाँ शक्तिको पार्टी घोषणामा कार्यव्यस्तताका कारण प्रचण्ड अनुपस्थित हुने सचिवालयले जनाए । सचिवालयका अनुसार प्रचण्ड आइतबार दिउँसो राजधानी आइपुगे लगत्तै राजधानीमा आयोजिक एक कार्यक्रममा सहभागी हुने कार्यतालिका छ ।


दशरथ रंगशालामा आयोजित कार्यक्रममा नयाँ शक्तिले प्रधानमन्त्री केपी शर्मा ओलीलाई समेत निमन्त्रण पठाइएको छ । पार्टी घोषणाबारे जानकारी दिन आयोजित पत्रकार सम्मेलनमा बोल्दै संयोजक भट्टराईले प्रधानमन्त्री केपी ओलीसहित सबै दलका प्रमुख नेताहरुलाई निम्तो गरिएको बताए ।


उनले भने कार्यक्रममा प्रचण्ड उपस्थित हुने विश्वास समेत व्यक्त गरे । ‘हामीले सबै दललाई निमन्त्रण पठाएका छौँ, प्रचण्डजीसँग पनि मेरो कुरा भएको छ, उहाँलाई समेत उपस्थितिका लागि आग्रह गरेको छु, उहाँ आउनुहुन्छ भन्ने मेरो विश्वास छ ।’ उनले भने । आजको कमाण्डर पोस्टमा खबर छ  ।


गत असोज ०९ गते भट्टराईले प्रचण्ड नेतृत्वको तत्कालीन एमाओवादी पार्टी परित्याग गरेर नयाँ शक्ति निर्माणमा जुटेका डा. भट्टराईले गैरमाओवादीलाई समेत मिलाएर रंगशालाबाट नयाँशक्ति घोषणा गर्न लागेका हुन् ।


स्रोतका अनुसार प्रचण्डले भट्टराईको पार्टी घोषणामा प्रतिनिधि पठाउने तयारी गरेका छन् । तर त्यसबारे आधिकारिक निर्णय भने भएको छैन ।