चन्दको बन्द, काठमाडौंमा मन्द

Posted on: June 09, 2016 | views: 328

२७ जेठ, काठमाडौं ।
नेत्रविक्रम चन्द नेतृत्वको नेकपा माओवादीले आज नेपाल बन्द गराएको छ । बन्दको सामान्य प्रभाव परेको छ । काठमाण्डु उपत्यकासहित अधिकांस शहरमा गाडीहरु चलिरहेका छन् ।

काठमाडौं उपत्यकामा अरु दिनको भन्दा केही कम गाडी चले पनि प्रभाव भने खासै नपरेको प्रहरीले जनाएको छ । ठाउँठाउँमा यातायातमा तोडफोड र आगजनी बन्दकर्ताले गरेका छन् ।

आफ्ना नेता तथा कार्यकर्ता रिहाइसहित विभिन्न माग राख्दै चन्द नेतृत्वको माओवादीले बन्द गरेको जनाएको छ । भाडाका सवारी साधान कम चले पनि निजी सवारी साधन साधन भने चलेको महानगरीय ट्राफिक प्रहरीले जनाएको छ ।

बन्द आह्वानकर्ताले काठमाण्डुको तीनकुनेमा एउटा ट्याक्सीमा आगजनी गरेका छन् । दुईजनाले बा १ ज ८२०६ नम्बरको ट्याक्सीमा पेट्रोल छर्किएर आगजनी गरेका हुन् । चालक सुवास परियार ट्याक्सीभित्रै रहेका बेला उनीहरुले आगजनी गरेका थिए । आगजनी गरेर उनी भागेका थिए । तत्काल आगो निभाएकाले ट्याक्सीमा सामान्य क्षति पुगेको छ ।

बन्दमा अप्रिय दुर्घटना नहोस् भन्नका लागि ठूलो संख्यामा सुरक्षाकर्मी परिचालन गरिएको छ । महानगरीय प्रहरी परिसरका अनुसार बन्द गराउँदै हिंडेका २१ जनालाई राजधानीका विभिन्न स्थानबाट पक्राउ गरिएको छ ।



ताजा अपडेट