ढुक्क भएर नेपालमा लगानी गर्न बिदेशीलाई प्रधानमन्त्रीको आग्रह

Posted on: June 08, 2016 | views: 218

२६ जेठ, काठमाडौं ।
प्रधानमन्त्री केपी शर्मा ओलीलेसंविधान जारी भएसँगै उपयुक्त वातावरण बनेकाले लगानी गर्न अन्तर्राष्ट्रिय समुदायलाई आग्रह गर्नुभएको छ ।

आफ्नो कार्यकक्ष सिंहदरबारमा आज दातृ निकायका प्रतिनिधिसँगको छलफलमा प्रधानमन्त्री ओलीले नेपालको आर्थिक विकासमा सहयोग गर्न आग्रह गर्नुभएको प्रधानमन्त्रीका परराष्ट मामिला सल्लाहकार गोपाल खनालले जानकारी दिनुभयो ।

प्रधानमन्त्री ओलीसँग बेलायती विदेश मन्त्रालयका सचिव सर साइमन म्याकडोनाल्ड र बेलायती अन्तर्रा्ष्ट्रिय विकास सहयोग नियोग 'डिएफआइडी' का सचिव मार्क लोकक र संयुक्त राष्ट्रसङ्घीय शरणार्थीसम्बन्धी उच्चआयुक्तको कार्यालय 'युएनएचसिआर' का प्रतिनिधिले छुट्टाछुट्टै छलफल गर्नुभएको थियो ।

दुबै भेटमा नेपालको संविधान, आर्थिक विकास र दुई पक्षीय सम्बन्धबारे सौहार्दपूर्ण कुराकानी हुनाका साथै नेपालको आर्थिक विकासमा कसरी दातृ निकायकोे लगानी भित्र्याउन सकिन्छ भन्नेबारे कुराकानी भएको प्रधानमन्त्री कार्यालयले जनाएको छ ।