निर्वाचन क्षेत्र विकास कार्यक्रमको बजेट दुरुपयोग भए कसैलाई छोड्दैनौं-रवीन्द्र अधिकारी

Posted on: June 08, 2016 | views: 219

२६ जेठ, काठमाडौं ।
विकास समितिका सभापति रवीन्द्र अधिकारीले निर्वाचन क्षेत्र विकास कार्यक्रमको बजेट दुरुपयोग भएको पाइए जुनसुकै राजनीतिक दलका नेता र सांसद भए पनि नछोड्ने बताएका छन् ।

व्यवस्थापिका–संसद् मातहतको उक्त समितिको आजको बैठकमा निर्वाचन क्षेत्र विकास कार्यक्रम र निर्वाचन क्षेत्र पूर्वाधार कार्यक्रमको प्रभावकारिताका विषयमा भएको छलफलपछि सभापति अधिकारीले कसैले पनि बजेटको दुरुपयोग गर्ने नियतले काम गरेको भेटिएमा कारबाहीका लागि सिफारिस गर्ने चेतावनी दिए ।



एक दुई जनाबाट भएको कमीकमजोरी र दोषको भागिदार सबै सांसद हुनुपर्ने अवस्थाको अन्त्य गर्न सुझाव दिँदै आफूले काम बिगार्ने, दिएको जिम्मेवारी पूरा गर्न नसक्ने अनि अरुलाई दोष दिएर उम्कन खोज्ने प्रवृत्ति हटाउनुपर्ने अधिकारीको भनाई छ ।



यसअघि बैठकमा सांसद तथा समिति सदस्यहरुले निर्वाचन क्षेत्र विकास कार्यक्रमबाट अरु आयोजनाको लागत मूल्यको तुलनामा तीनगुना सस्तोमा गुणस्तरीय काम भएको जिकिर गर्दै एकाध घटनाबाहेक उक्त कार्यक्रमको बजेट अत्यन्तै प्रभावकारी रुपमा सदुपयोग भइरहेको धारणा राखेका थिए ।