एमालेमा चर्कियो मतभेद : ओली र नेपालबीच बैठकमै भनाभन, बामदेव मौन

Posted on: June 07, 2016 | views: 514

काठमाडौं, जेठ २५ ।  सरकार गिराउनका लागि भारतले नेताहरुबीच विभाजन ल्याउने गरी खेलिदिएपछि सरकार नेतृत्व गरिरहेको नेकपा एमालेको स्थायी समितिमा भनाभन भएको छ । अध्यक्ष तथा प्रधानमन्त्री केपी शर्मा ओली र नेता माधवकुमार नेपाल पक्षबीच भनाभन भएको हो । स्थायी समितिमा बामदेव गौतम भने मौन रहेका थिए । आफ्नो पार्टीले सरकारलाई लोकप्रिय हिसावले चलाउँदाचलाउँदै पनि सरकार परिवर्तन, भद्र सहमतिको नाममा नेपाल र खनालको अभिव्यक्ति आएपछि चिढिएका ओलीको बचाउमा उनी पक्षधर नेताहरुले जवाफ मागेका थिए । नेपाल पक्षका नेताहरुले जवाफको साटो पार्टी र सरकार आफुखुसी चलाउने भन्दै बुर्कुसी मारेका थिए ।


सरकारको नेतृत्व गरिरहेको एमाले र एमाओवादीलगायतका दलहरुको संस्थागत सहकार्य बलियो भएपछि सरकार गिराउन असफल भारत र प्रमुख प्रतिपक्षी दल नेपाली कांग्रेसलगायत आन्दोलनमा रहेका मधेसी मोर्चाका नेताहरुले एमालेभित्र नेपाल समुहलाई उचालेको थियो । माधव नेपाललाई प्रधानमन्त्री बनाउने खेलमा एमालेभित्र विवाद सृजना भएको थियो ।


भारतसँग चिसिएको सम्बन्ध सुधार्ने जिम्मा नेपालका लागि भारतीय राजदूत रणजित रायकै भएको भन्दै विदेश मन्त्रालयले उनलाई त्यो जिम्मेबारी दिएपछि आफ्ना सवैभन्दा नजिकका नेताका रुपमा उनले एमालेको फरक खेमाका नेता माधवकुमार नेपाललाई भेटेका थिए ।


नेपालले रअका पूर्व प्रमुख आलोक जोशीसँग भेटेपछिका दिनमा सरकारविरुद्ध अभिव्यक्ति दिँदै आएका थिए ।

‘सरकार हामीले चलाएका छौं, राम्रो जनमतको आधार बनेको छ तर किन विरोध ?’, वैठकमा एक स्थायी समिति सदस्यले प्रश्न गरे, ‘विरोधका लागि विरोध गरेर केही हुन्न हामी कसैको गोटी बन्न हुँदैन ।’ वैठकमा चर्को विवाद भएपछि नैतिक संकटमा परेका नेपाल र चर्को दबाबमा परेका प्रधानमन्त्री ओली अन्ततः एउटा सहमतिमा पुगेका थिए । एमालेले आधिकारीक रुपमा नै राष्ट्रिय सहमतिको सरकारका लागि पहल भए स्वीकार्ने तर त्यो एमालेको नेतृत्वमा हुनुपर्ने विज्ञप्ति जारी गरेको थियो ।


यस्तो मध्यमार्गी विज्ञप्ति जारी गराउनका लागि सचिव योगेश भट्टराई, गोकर्ण विष्टलगायतले भुमिका खेलेको स्रोतले जनाएको जनप्रहार साप्ताहिकमा खबर छ ।