असुरक्षा भयो भन्दै प्रकाश दाहालले मागे, ‘बन्दुक र गोलीको लाइसेन्स’

Posted on: June 05, 2016 | views: 667

काठमाडौं,जेठ २३ । लाजिम्पाटस्थित पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ को निवासमा २४ घण्टा प्रहरी पहरा छ । घर तथा व्यक्तिगत सुरक्षार्थ सशस्त्र र नेपाल प्रहरीका ३० भन्दा बढी सुरक्षाकर्मी उनका वरिपरि परिचालित छन्, जसको नेतृत्व गर्छन् सशस्त्र प्रहरीका डीएसपी ।सर्वाधिक बलियो सुरक्षा घेराभित्र रहने शीर्ष नेपाली नेता हुन् प्रचण्ड । तर, त्यति बजबुत सुरक्षा घेराभित्र रहँदासमेत उनका पुत्र प्रकाश दाहालले चाहिँ आफूलाई सुरक्षित महसुश गर्न सकेका रहेनछन् । त्यसको पुष्टि गर्छ, ६ महिनाअघि प्रकाशले जिल्ला प्रशासन कार्यालयमा नीजि सुरक्षाको लागि हतियार आयात गरी राख्न पाउनको लागि दिएको निवेदनले ।


गृहमन्त्रालय स्रोतका अनुसार प्रकाशले शक्तिबहादुर बस्नेत गृहमन्त्री भएको दुई महिनापछि हतियारका लागि जिल्ला प्रशासन कार्यालयमा निवेदन दिएका थिए । तर, पटक–पटकको प्रयासका बाबजुत हतियार राख्ने उनको चाहना पूरा हुन पाएको छैन ।

जिल्ला प्रशासन कार्यादयसम्बद्व सूत्रका अनुसार सुरुमा प्रकाशले पेस्तोलकै इजाजत लिन प्रयास गरेका थिए । तर, कानुनले ९ एमएमभन्दा मूनिको हतियार सरकारबाहेक कसैलाई राख्ने अनुमति दिँदैन् । यो बुक्रेपछि प्रकाशले पेस्तोलको रहर त्यागे ।


त्यसपछि चाहिँ उनले १२ बोर बन्दुक एउटा, त्यसको टोटा एक सय ओटा र २२ बोरको राइफल एउटा र त्यसमा प्रयोग हुने गोली दुई सय थान आयात गरी राख्न पाउने इजाजतको लागि जिल्ला प्रशासनमा विधिवत् निवेदन दिएका हुन् ।


प्रमुख जिल्ला अधिकारी रामकृष्ण सुवेदी प्रकाशले हतियार खरिद गरी राख्न पाउने इजाजत लिन गरेको प्रयासबारे अव्यवहारिक रुपमा प्रस्तुत भए ।


उनले प्रकाशले हतियार खरिदका लागि निवेदन दिएको स्वीकार त गरे तर यसबारेमा ‘किन खोजी गरेको’ भन्दै हप्कीदप्कीको शैलीमा प्रस्तुत भए ।


‘नयम अनुसार पाउने हतियारका लागि प्रकाशले निवेदन दिएका छन् । उनको मात्र किन ?’


२० जेठ दिउँसो आफ्नै कार्यकक्षमा प्रकाशले हतियारको इजाजत लिन खोजेको प्रसंग निस्कनुअघिसम्म नरम देखिएका प्रमुख जिल्ला अधिकारी सुवेदी त्यसपछि एकाएक रुखो शैलीमा प्रस्तुत भए, ‘निमयभित्र रहेर तपाईंले पनि, मैले पनि इजाजत लिन पाइन्छ ।’ उनले भने ।


‘साँच्चै सुरक्षा थ्रेट भएरै प्रकाशले हतियार राख्ने इजाजत लिन खोजेका हुन् त ? प्रकाशलाई सुरक्षा थ्रेट नै छैन भन्न त सकिन्न,’ प्रकाशको ‘कोर टिम’भित्रका एक सहकमीृ भन्छन्, ‘तर, हतियार र इजाजत पत्र लिँदा मात्र सुरक्षित हुन सकिन्छ भन्ने उनको बुझाइ हो भने त्यो पनि राम्रो होइन ।’ नेपाल साप्ताहिकमा खबर छ ।