भक्तपुरमा संघीय गठबन्धनको बिरोधसभा

Posted on: May 24, 2016 | views: 218

११ जेठ, भक्तपुर ।
आन्दोलनरत २९ दलीय संघीय गठबन्धनले आज भक्तपुरमा बिरोध सभाको आयोजना गरेको छ ।

बिरोधसभामा बोल्दै राष्ट्रिय मधेश समाजवादी पार्टीका अध्यक्ष शरदसिंह भण्डारीले संघीय गठबन्धनको अस्तित्व स्वीकार नगरेसम्म सरकारसंग वार्तामा नबस्ने बताउनु भएको छ ।

उहाँले संघीय गठबन्धन भित्रै मधेशी मोर्चा पनि भएकाले यो अस्तित्वलाई सरकारले स्वीकार गरेर मात्रै वार्तामा बोलाउनु पर्ने बताउनुभयो ।उहाँले सरकारले संघीय गठबन्धनलाई फुटाउने षडयन्त्र गरेको आरोप लगाउनुभयो ।

कार्यक्रममा तराई मधेश सद्भावना पार्टीका अध्यक्ष महेन्द्र राय यादवले सार्थक वार्ताको पक्षमा गठबन्धन रहेको बताउँदै सरकारले सार्थक वार्ता नचाही आन्दोलन दबाउन खोजेकाले वार्ता सफल हुन नसकेको जिकिर गर्नुभयो ।

त्यस अवसरमा संघीय समाजवादी फोरमका उपाध्यक्ष रकम चेम्जोङ्गले गठबन्धनको अहिलेको आन्दोलन निर्णायक आन्दोलन भएको दाबी गर्दै जातीय समानुपातिक प्रतिनिधित्व र अधिकारको सुनिश्चितता नभएसम्म आन्दोलन जारी रहने बताउनुभयो ।

कार्यक्रममा गठबन्धनमा आबद्ध बिभिन्न दलका नेताहरुले देशभरका विभेदमा परेका जनताको अधिकारका लागि अहिलेको आन्दोलन भएकाले सबैलाई साथ दिन आग्रह गर्नुभएको थियो ।