प्रचण्डले रेणुलाई महासचिव बनाउन खोजेपछि पेरिसडाँडामा रुवाबासी

Posted on: May 01, 2016 | views: 203

काठमाडौं,बैशाख १ । एमाओवादी अध्यक्ष पुष्पकमल दाहाल प्रचण्डले आफ्नी छोरी रेणुलाई पार्टीनिकट महिला संगठनको महासचिव बनाउन खोजेपछि नेतृहरु चर्को विरोधमा उत्रिएका छन् । यही विवादबीच सोमबार बिहानैदेखि पेरिसडाँडामा महिलाको चर्को रुवाबासी चल्दा वरपरका बासिन्दासमेत के भयो भन्दै हेर्न पुगेका थिए ।

२३ चैतदेखि २५ गतेसम्म काठमाडौंमा चलेको अनेमसंघ क्रान्तिकारीको छैटौं राष्ट्रिय सम्मेलनले पदाधिकारी चयन गर्न नसकेपछि पार्टीको तर्फबाट धर्मशिला चापागाई अध्यष रहने गरी केन्द्रीय सदस्यको नामावली प्रस्तुत गरिए पनि अन्य पदाधिकारीचाहिँ केन्द्रीय समितिले चयन गर्ने प्रस्ताव थियो ।

तर, पदाधिकारीका आकांक्षी धेरै भएपछि पार्टीले त्यहाँ पनि हस्तक्षेप गर्न खोजेको भन्दै महासचिवका दाबेदार विमला सुवेदीसहित ताम्सालिङ महिलाले बैठक बहिस्कार गरेका छन् । उता, महासचिवको दाबी नछाडेकी रुकुमकी विमला केसीले पार्टी नेताले प्रचण्ड पुत्रीलाई जबरजस्ती उठाउन लागेको भन्दै सोमबार बिहान धर्धरी रोएर यसलाई नमान्ने घोषणा गरेकी हुन् ।

विमला केसी जनार्दन शर्माका भतिज बसन्तकी श्रीमती हुन् । लामो समयदेखि महिला आन्दोलनमा सक्रिय उनलार्य अध्यक्ष नै बनाउनुपर्नेमा जनार्दन शर्माले जोड गर्दै आएपनि महासचिव कृष्णबहादुर महरा र सचिव वर्षमान पुनले झापाकी धर्मशिलालाई अध्यक्ष बनाएको स्रोतको दाबी छ ।

पदाधिकारीमा आकांक्षी धेरै भएपछि महरा र वर्षमानले सोमबार बिहान १७ जना उपाध्यक्ष, १ महासचिव, १५ सचिव र १ कोषाध्यक्ष बनाउने भन्दै प्रचण्डपुत्री रेणुको नाम महासचिवमा प्रस्ताव गर्दा विमला केसी आफू उापध्यक्षको हुलमा नबस्ने भन्दै धुरुधुरु रोएकी थिइन् । त्यसपछि त्यहाँ एकपछि अर्को गर्दै रुवाबासी चलेको हो ।

उता, नारायाणकाजीनिकट पूर्वएकता केन्द्रका महिलाले पनि आफूहरुलाइ अपमान गरिएको तथा महिला फ्र्याक्सन इञ्चार्ज शशी श्रेष्ठलाई बाइपास गरिएको भन्दै बैठक बहिस्कार गरेका छन् । जनआस्था साप्ताहिकमा खबर छ ।