नेकपा नुवाकोटको संघ, प्रदेस र स्थानीयतहको समायोजन टुंगियो

Posted on: November 30, 2019 | views: 341

नुवाकोट । नेपाल कम्युनिष्ट पार्टी (नेकपा) नुवाकोटको प्रतिनिधिसभा, प्रदेससभा र स्थानीयतहमा पार्टी एकतापछि रिक्त रहेको नेतृत्वको जिम्मेवारी बाँडफाँट गरेको छ ।

पार्टी कार्यालयका पदाधिकारीको शुक्रबार काठमाडौमा सम्पन्न बैठकले प्रतिनिधिसभा र प्रदेससभाको संयोजक र सचिव चयन गरेको छ भने बाह्रवटै स्थानीयतहमा अध्यक्ष, सचिव, इञ्चार्ज र सह–इञ्चार्ज चयन गरेको नेकपा नुवाकोटका इञ्चार्ज महेन्द्रबहादुर पाण्डेले जानकारी दिनुभयो ।

उहाँको अनुसार निर्वाचन क्षेत्र नं. १ को संयोजकमा पदम उप्रेती र सचिवमा राजन गौतमलाई जिम्मेवारी दिइएको छ । क्षेत्र नं. २ को संयोजकमा राजकुमार रेग्मी ‘सन्देश’र सचिवमा हरी अधिकारी चयन हुनुभयो । 

प्रदेश नं १ (क) को संयोजकमा बलराम आचार्य र सचिवमा राजन श्रेष्ठ, प्रदेश १ (ख) को संयोजकमा सुवास तामाङ र सचिवमा जीतबहादुर घलेलाई जिम्मेवारी दिइएको छ । 

प्रदेससभा २ (क) को संयोजकमा नविन पुडासैनी र सचिवमा माधव पाण्डे, प्रदेससभा २ (ख) को संयोजकमा गणेश श्रेष्ठ र सचिवमा सुवास तामाङलाई जिम्मेवारी दिइएको जिल्ला इञ्चार्ज पाण्डेले जानकारी दिनुभयो ।  

बैठकले स्थानीयतह अनुसार जिल्लाको बाह्रैवटा पालिकाको इञ्चार्ज, सहइञ्चार्ज, अध्यक्ष र सचिवको नाम टुंगो लगाएको छ ।

नेतृत्व चयनको क्रममा दुई पार्टी साविक नेकपा (एमाले) र माओवादी केन्द्र मध्ये एकअर्को गरेर बराबर सङ्ख्यामा पद विभाजन गरिएको छ । प्रतिनिधिसभा, प्रदेससभा, स्थानीयतहमा पदीय विभाजनको लागी ७२ पदमा महिला एकजना मात्र किस्पाङ गाउँपालिकाको सहइन्चार्जमा श्रीमाया लामा चयन हुनुभएको छ । नेकपा नुवाकोटका नारायणप्रसाद खतिवडाको अनुसार वडाकमिटी विस्तार गर्न सम्बन्धित स्थानीयतहको नेतृत्वलाई जिम्मेवारी दिइएको छ ।