‘ सरकार परिवर्तन गर्ने बेला भईसकेको छैन’-उपप्रधानमन्त्री थापा

Posted on: May 02, 2016 | views: 127

दाङ, चैत २७ । उपप्रधान तथा परराष्ट्रमन्त्री कमल थापाले सरकारले शुक्रबार गठन गरेको ‘संघीयता  कार्यान्वयन उच्चस्तरीय समिति प्रति आफ्नो असन्तुष्टि रहेको स्पष्ट पारेका छन ।  रिपोर्टर्स क्लब नेपाल दाङले शनिवार आयोजना गरेको साक्षात्कारमा उनले समितिमा स्थानीय विकास मन्त्रालयलाई नसमेटेको भन्दै आफूले त्यसबारेमा प्रधानमन्त्रीसँग कुराकानी गर्ने बताए ।

साक्षात्कारमा उनले भने,‘हिँजो दश बजे मन्त्री परिषदको बैठक भनेर बोलाइएको थियो तर, ११ बजेसम्म बैठक बसेन अनि म अर्काे पूर्वनिर्धारित कार्यक्रमको लागि हिँडे त्यसपछि बैठक बसेर समिति बनाइएछ । त्यसमा संघीय मामला तथा स्थानीय विकास मन्त्रालयलाई राखिएन ।
थापाले थपे ‘संघीयता कार्यान्वयन गर्ने सबैभन्दा महत्वपूर्ण मन्त्रालय भनेको संघीय मामला तथा स्थानीय विकास मन्त्रालय नै हो, यो नियतवश गरिएको त हैन होला, एक पटक प्रधानमन्त्रीसँग कुरा गरेँ भने मिल्नसक्छ ।’
उनले अहिले नै सरकारको विकल्प खोज्ने बेला भइनसकेको स्पष्ट पार्दै अझैं संविधान कार्यान्वयनका धेरै कामहरु बाँकी रहेको र सरकार गठनको ६ महिनामात्रै भएका हुँदा अहिले नै त्यस्तो कुरा चलाउनु सरकार र संविधानलाई कमजोर गराउने खेलमात्रै हुने दावी गरे ।
थापाले भने,‘राप्रपा नेपालसमेत सहभागी भएको सरकारभन्दा अर्काे राष्ट्रिय सहमतिको सरकार कस्तो हुन्छ ?, प्रजातान्त्रिक पद्धतिमा सबै दलहरु मिलेर सरकारमा जाँदा प्रतिपक्ष पनि कमजोर हुन्छ र संविधान अनि राज्यसमेत कमजोर हुन्छ ।’
उनले जनताको विश्वास भए संबिधान अनुसार नै राजतन्त्र फिर्ता हुने दावी गर्दै जनताको विश्वास भए संविधानमा हिन्दू राज्य र राजतन्त्र आउन सक्ने बताए ।  संवैधानिक राजतन्त्र र हिन्दू राज्यको मागमा कत्ति पनि बिचलित नभएर पनि सरकारमा छिरेको दावी गर्दै राप्रपा नेपालका अध्यक्ष समेत रहेका थापाले भने ‘के सम्भव छ भनेर हामी यो मागमा अडेका होइनौँ, के आवश्यकता हो भन्ने कुराले हामी राजतन्त्र र हिन्दू राज्य मागेका हौँ ।’
थापाले कुनै पनि व्यवस्था परिवर्तन गर्नका लागि अब फेरि पहिलाको जस्तै आन्दोलन नै गर्नु अवस्था नरहेको उल्लेख गर्दै भने,‘संविधानकै माध्यमबाट आफ्ना मान्यता स्थापित गराउन सकिन्छ, अब आफ्ना माग पूरा गराउनका लागि बन्दूक बोकेर जंगल पनि जानु पर्दैन, सिमामा बसेर नाकाबन्दी पनि गर्नुपर्दैन ।’

उनले संविधानप्रति राप्रपा नेपालको समेत असन्तुष्टि रहेको र बहुमतको कदर गरेर राप्रपाले संविधान स्विकारेको पनि बताए । ‘हो, यो संविधानमा हाम्रो पार्टीका आधारभूत मान्यताहरुसमेत समेटिएका छैनन् तर, अत्यधिक बहुमतले त्यसलाई पारित गरिसकेपछि त्यसलाई स्विकार गर्नु प्रजातिन्त्रक आदर्श हो ।’ उनले भने ।
संविधानमा कुनै पनि कुरा अपरिवर्तनीय नभएको दाबी गर्दै थापाले अब आफ्ना मान्यताहरु प्नि राप्रपाले संविधानकै माध्यमबाट स्थापित गर्ने दाबी समेत गरे । उनले आगामी अध्यावधिक चुनावमा राप्रपाले त्यो मुद्दामा जित हासिल गर्ने दाबी पनि गरे ।