लिखु गाउँपालिकालाई विप्लव माओवादीले दियो यस्तो चेतावनी (पत्र सहित)

Posted on: August 05, 2019 | views: 1368

विदुर । नुवाकोटको लिखु गाउँपालिकाले यस आर्थिक वर्षको लागी नदी जन्य सामाग्रिको निकासी करमा आह्वान गरेको टेन्डरको प्रक्रिया रोक्न नेकपा विप्लव माओवादीले चेतावनी दिएको छ ।
नेकपा विप्लव माओवादीको जिल्ला सेक्रेटरी विन्तोष सिलवाल (अशोक)ले विज्ञप्ती जारी गर्दै जेठदेखि असोजसम्म गाउँपालिकाको खोलाहरुमा हेभी उपकरण प्रयोग गरेर नदीजन्य सामाग्रिको अबैध उत्खनन्, संकलन र निकासी हुने गरेकाले हाल आह्वान गरेको टेन्डर (बोलपत्र)ले अबैध उत्खनन्लाई नै सहयोग पुग्ने भन्दै रोक्नको लागी चेतावनी दिइएको छ ।


हाल गाउँपालिकाले खोलेको टेन्डरले अबैध उत्खनन्देखि निकासीसम्मलाई सहयोग पुग्ने देखिएकाले बर्षातको समयअवधिभर कुनै टेन्डर नखोल्न र खोलेको भए खारेज गर्न (त्यसलाई रद्द गर्न) माग गरिएको छ ।
विज्ञप्ती मार्फत टेन्डर प्रक्रिया अघि नबढाउन सचेत गराउदा समेत त्यसको बर्खिलाप गरेर जान खोजेमा उत्पन्न हुने परिस्थितीको जिम्मेवार गाउँपालिकाको अध्यक्ष, उपाध्यक्ष र प्रमुख प्रशासकीय अधिकृत हुने समेत चेतावनी दिइएको छ ।
लिखु गाउँपालिकाले आह्वान गरेको टेन्डर यही साउन १४ गते सार्वजनिक गर्ने म्याद तोकिएपनि बोलपत्रमा सहभागी भएका व्यवसायीबीचको विवादको कारण पक्रिया ढिलाई हुदै आइरहेको थियो ।
जिल्लामा रहेका सबै स्थानका नदी र खोलाजन्य सामाग्रिको उत्खनन, संकलन र निकासीको कानूनी प्रक्रिया पूरा नगरी गतिविधि सञ्चालन हुने गुनासो कायम भएपनि नेकपा विप्लव माओवादीले जारी गरेको विज्ञप्तीमा लिखु गाउँपालिकालाई मात्र सम्बोधन गरेर टेन्डर प्रक्रिया अघि नबढाउन चेतावनी दिएको हो ।


चेतावनी सहितको बिज्ञप्ती गाउँपालिकाको कार्यालयमा आज प्राप्त भएपनि त्यो कहिले जारी भएको भन्ने मिति भने उल्लेख गरिएको छैन ।