कर्मचारी सरुवामा मन्त्री मातृका यादवले स्वकीय सचिवबाट घुस खाए ?

Posted on: May 15, 2019 | views: 1588

काठमाडौ ।  कर्मचारी सरुवाको विषयलाई लिएर उद्योग, वाणिज्य तथा आपूर्ति मन्त्रालयमा केहीबेर होहल्ला मच्चिएको छ ।  

उद्योग, वाणिज्य तथा आपूर्ति मन्त्री मातृका यादवका निजी सचिव प्रेम आचार्यले घुस लिएर कर्मचारीको अनियमित सरुवा गरेको केही कर्मचारीले आरोप लगाएपछि दिउँसो केहीबेर होहल्ला मच्चिएको हो ।

मन्त्रालयले उद्योग विभागमा उपसचिव विनोद खड्कालाई सरुवा गरेको थियो । तर उपसचिव शोभाकर रेग्मीले आफू विभागमा सरुवा हुनुपर्नेमा अरुलाई गरिएको भन्दै विरोधमा उत्रनुभएको हो ।

मन्त्रालयबाट सहसचिव रेग्मीले उद्योग विभागमा सरुवा हुने इच्छा देखाएको भए पनि मन्त्रीले खड्कालाई पठाइएपछि विवाद उत्पन्न भएको हो । खड्का नेकपा निकट मानिन्छन भने रेग्मी कांग्रेस निकट कर्मचारी संगठनका उपाध्यक्ष हुन् ।  

रेग्मीसँगै शाखा अधिकृत विश्वबन्धु रेग्मीलगायत कांग्रेस निकट कर्मचारीको समूह सरुवा अनियमित तरिकाले गरिएको भन्दै मन्त्रीका निजी सचिव आचार्यको कार्यकक्षमा होहल्ला गर्दै पुगेपछि कार्यकक्षमै रहेका मन्त्री यादव निस्केर किन हल्ला गरेको भन्दा मन्त्री र कर्मचारीबीच केहीबेर धकेलाधकेल हुन पुगेको आधिकारिक ट्रेड युनियनका केन्द्रीय सदस्य विश्व रेग्मीले बताउनुभयो ।

मन्त्री यादवले ‘झगडा गर्ने को हो, घूस खाएको के प्रमाण छ ? त्यसै आरोप लगाउने भन्दै प्रमाणित नगर्ने भए थुन्दिन्छु’ भन्दै ढोका लगाउन निर्देशन दिएपछि धकेलाधकेल हुन पुगेको थियो ।  

मन्त्री यादवले अनियमति तरिकाले भएको सरुवाको बारेमा बुझ्न गएका कर्मचारीमाथि नै हात हाल्न खोजेको आधिकारिक ट्रेड युनियनका केन्द्रीय सदस्य विश्व रेग्मीले आरोप लगाउनभएको छ । यता मन्त्रीका निजी सचिव आचार्यले भने कर्मचारीहरुले होहल्ला गर्दै मन्त्रीमाथि नै हातपातको प्रयास गरेको दाबी गर्नुभएको छ ।

तर कर्मचारीहरुले भने मन्त्री यादव आफ्नो कार्यकक्षबाट बाहिर निस्केर आफूहरुमाथि हातपातको प्रयास गरेको त्यहाँ रहेको सीसी टीभी फुटेजबाट हेर्न सकिने दाबी गरेका छन् ।

मापदण्ड अनुरुप सरुवा हुनुपर्यो भन्दा मन्त्रीले उल्टै कर्मचारीलाई हातपातको प्रयास गर्नु निन्दनीय कार्य भएको केन्द्रीय सदस्य रेग्मीले बताउनुभयो ।  

मन्त्री यादवका निजी सचिव आचार्यले भने ती कर्मचारीहरुले उद्योग विभाग जान नपाएको झोँकमा आफूमाथि घूस लिएको आरोप लगाएको दाबी गर्नुभयो ।