प्रकाण्डलाई फेरी तीन दिन थुनामा राख्न अदालतले अनुमति दियो

Posted on: August 29, 2018 | views: 616

१३ भदौ, नुवाकोट ।
नेत्रविक्रम चन्द नेतृत्वको नेपाल कम्युनिष्ट पार्टीका प्रवक्ता खड्गबहादुर विश्वकर्मालाई जिल्ला अदालत नुवाकोटले तीन दिन थुनामा राख्न बुधबार फेरी तेश्रो पटक अनुमति दिएको छ । अदालतको अनुमति सगै गएको शुक्रबार जिल्ला अदालतमा आगजनी अभियोगमा मुद्धा दर्ता गरी प्रहरी हिरासतमा रहनुभएका पूर्वमन्त्री प्रकाण्डलाई आइतबारसम्म अनुसन्धान गर्न प्रहरीले अनुमति पाएको छ ।


गएको शुक्रबार जिल्ला अदालतले अनुसन्धानका लागि तीन दिन म्याद थप गरेकोमा अनुसन्धान प्रक्रिया जारी रहेको भन्दै प्रहरीले समय माग गरेपछि जिल्ला न्यायाधीश ऋषीकेश वाग्लेको अनुपस्थिती रहेकाले श्रेष्तेदार शिवप्रसाद बञ्जराले थप तीन दिन अनुसन्धानको लागी नियन्त्रणमा राख्न प्रहरीलाई अनुमति दिनुभएको हो ।


यसभन्दा अघिको समयमा जस्तै, नुवाकोट प्रहरीले जिल्ला सरकारी वकिलको कार्यालय मार्फत ६ दिनको लागी समय माग गरेको भएपनि निमित्त जिल्ला न्यायाधीश समेत रहनुभएका श्रेष्तेदार बञ्जराले यो तेश्रो पटक पनि थप तीन दिनको समय थप गर्नुभएको हो ।


गएको साउन २२ गते कठमाडौमा प्रक्राउ पर्नुभएका पूर्वमन्त्री प्रकाण्डलाई विभिन्न अभियोग लगाएर थुनामा राखेको समयमा सर्वोच्च अदालतमा परेको बन्दीप्रत्यक्षीकरण रिटको आदेश दिदै गैहैकानूनी रुपमा थुनामा राखेको भन्दै रिहा गर्न आदेश दिएपनि तेश्रो पटक प्रहरीले पक्राउ गरी नुवाकोटमा ल्याएर यहाँको बेलकोटगढी नगरपालिका वडा नं. ९ स्थित सडक निर्माणमा प्रयोग भएको दुई थान स्काभेटरमा जलाएको अभियोग लगाइएको छ ।


बेलकोटगढी नगरपालिकको धमले–दुईपिल सडक खण्डको स्तरोन्नतिको जिम्मेवारी पाएको नागार्जुन कन्स्ट्रक्सन प्रालीको दुई थान स्काभेटरमा आगो लगाउन संलग्न रहेको अभियोगमा प्रकाण्ड विरुद्ध ६ महिना कैद र २ करोड २३ लाख रुपैयाँ मागदाबी सहित अदालतमा दर्ता गरेको आगजनी मुद्धामा कारबाहीको लागी अनुसन्धान भइरहेको नुवाकोटका प्रहरी प्रमुख बसन्त कुंवरले जानकारी दिनुभएको छ ।


घटनामा उहाँ सहित नेकपाको महासचिव नेत्रविक्रम चन्द, नुवाकोटका सेक्रेटरी सागर तिमिल्सिना, महिलासंगठनका नेता सबिता तामाङ, नुवाकोट जनसरकार प्रमुख विन्तोष सिलवाल सहित १५ जनालाई विपक्षी बनाइएको छ ।