नेकपा र कांग्रेसबीच संसदमा देखियो रियाक्सन

Posted on: May 25, 2018 | views: 1657

काठमाडौं । सरकारले प्रस्तुत गरेको नीति तथा कार्यक्रममाथिको छलफलमा सत्ता र प्रतिपक्षी दलका सांसदबीच जुहारी चलेको छ । प्रतिनिधिसभामा बुधबारदेखि सुरु भएको छलफल शुक्रबार सकिँदै छ भने राष्ट्रिय सभामा बिहीबारदेखि सुरु भएको छलफल शुक्रबार नै सकिने कार्यसूची छ । राजधानी दैनिकले समाचार छापेको छ ।

संसद्का दुवै सदनमा सत्ता पक्षका सांसदहरूले सरकारले ल्याएको नीति तथा कार्यक्रमको बचाउ गरेका छन् भने प्रतिपक्षले नीति तथा कार्यक्रम पञ्चवर्षीय योजनाजस्तो भएको आरोप लगाए ।

बिहीबारको संसद् बैठकमा सत्ता पक्षका सांसद एवं बाग्लुङ–१ प्रतिनिधिसभा सदस्य सूर्यप्रसाद पाठकले नीति तथा कार्यक्रमको आलोचना गर्ने सांसदलाई १५ जेठमा झोला बोकेर आउन सुझाव दिए । उनले यस्तो सुझाव दिएलगत्तै प्रतिपक्ष दल कांग्रेसका मानबहादुर विश्वकर्माले

‘झोला बोकेर आउनु’ भन्नुको अर्थ खोजे । उनले सरकारले दिनुपर्ने जवाफ सत्ता पक्षका सांसदहरूले दिनुले छलफलभन्दा पनि विभाजनको बाटो भएको बताए ।

पाठकले भने, ‘यहाँ केही साथीहरू नगदमा हिसाब खोजिरहनुभएको छ, १५ जेठमा दह्रै झोला बोकेर आउनुहोला, अर्थमन्त्रीले केही नगद हालेर पठाइदिनुहुन्छ, त्यही नगद लिएर जनताको बीचमा जानुहोला, तपाईंको पनि शिर उच्च हुनेछ ।’ पाठकले २०४८ सालमा विश्वेश्वरप्रसाद कोइरालाको समाजवादी नीतिलाई डस्टबिनमा फाल्नेहरूले अहिले समाजवादको कुरा गरिरहेको भन्दै आलोचना गरे । उनले थपे, ‘मैले होइन बीपीका अनुयायीहरूले प्रश्न सोधिरहेका छन्, बीपीको समाजवादी नीतिलाई डस्टबिनमा किन फालियो रु जवाफ कसले दिने हो रु’

उनले बीपीको सपनालाई डस्टबिनबाट उठाएर समाजवादी नीतिलाई प्राथमिकता दिएकोमा सरकारलाई धन्यवाद दिन आग्रहसमेत गरे ।
कांग्रेस सांसद विकले अर्थमन्त्रीले श्वेतपत्रमार्फत सदनमा झुट बोलेको आरोप लगाए । उनले संसद्मा नीति तथा कार्यक्रममाथि बोल्दै श्वेतपत्रमार्फत आएको तथ्यांक र राष्ट्र बैंकको तथ्यांक फरक परेकोमा अर्थमन्त्री युवराज खतिवडाको आलोचना गरे ।

उनले प्रश्न गरे, ‘अर्थमन्त्रीले श्वेतपत्रमार्फत देशको आर्थिक अवस्था टाट पल्टिएको छ भन्नुभएको छ, अर्कोतर्फ राष्ट्र बैंकले राष्ट्र बैंकमा ३ खर्ब रुपैयाँ भएको र त्यसले तरलता उब्जाएको भनिएरहेको छ, यी दुईमध्येमा कुन झुटो हो रु राष्ट्र बैंक एउटा संस्था हो, ऊ झुट बोल्न सक्दैन तर अर्थमन्त्रीलाई झुट बोल्न किन प¥यो रु सदनलाई किन गुमराहमा राखियो रु’

सांसद अग्निप्रसाद सापकोटाले भूकम्पपछि सिन्धुपाल्चोकको तातोपानी नाका बन्द भएको बताउँदै नाका खोल्नेतर्फ सरकारको ध्यानकर्षण गराए । उनले अझै राहत पाउन नसकेका भूकम्पपीडितलाई सहुलियत ऋण दिने विषयमा समेत कुनै प्रगति हुन नसकेको बताए । भूकम्पपीडितलाई सहुलियत दरको ऋण उपलब्ध गराउन बैंकहरूबाट समस्या आएको भए त्यसलाई समाधान गर्नेतर्फ सरकारको ध्यान जानुपर्ने बताउँदै उनले मुलुकको समृद्धिको पाटोमा नीति तथा कार्यक्रम सम्बोधन गर्न सफल भए पनि बजेटमा सबै विषय समेट्नुपर्ने बताए ।
राजपाका सांसद लक्ष्मणलाल कर्णले नीति तथा कार्यक्रमले सपना मात्रै बाँडेको बताए । उनले सरकारले नीति तथा कार्यक्रमले समेटेका कुरा सपनामा रेल चढेर वीरगन्जदेखि काठमाडौंसम्म आइपुगेजस्तो भएको व्यंग्य गरे । उनले संविधानलाई सर्वस्वीकार्य बनाउनेगरी विषय उठान हुनुपर्नेमा कुनै विषय नसमेटिँदा दुःख लागेको बताए । उनले संविधानमा भएको त्रुटिहरूलाई सम्बोधन गर्ने विषयमा कुनै काम नहुनु तर जनतालाई यो काम गर्छु र त्यो काम गर्छु भनेर सपना बाँड्ने काम मात्रै भएको बताए ।

मुलुकको समृद्धिका लागि सबै जनताले स्वीकार गर्नेगरी सबै स्थानीय तह र प्रदेश सरकारसँगको दूरी बढाउने नभई समन्वयकारी भूमिका निर्वाह गर्न सरकार लाग्नुपर्ने उनको सुझाव थियो ।

कांग्रेसका सांसद दिलेन्द्रप्रसाद बडुले नीति तथा कार्यक्रमले अप्रासंगिक कुरा उठाएको बताए । संघीयता बिर्सिएको नीति तथा कार्यक्रम भन्दै थपे, ‘संघीयतालाई बलियो बनाउने विषयमा कुनै कुरा नसमेटिनुले यसले संघीयताविपरीत बोलेको छ ।’

नीति कार्यक्रमले राजनीतिक परिवर्तनलाई पनि भुलेको बडुको आरोप थियो । उनले भने, ‘चीनबाट पनि काठमाडौंमा रेल ल्याउने र भारतबाट पनि काठमाडौंमा नै रेल जोड्ने कुराले स्पष्ट पारेको छ कि यो नीति तथा कार्यक्रम केन्द्रीकृत छ, कर्णाली र प्रदेश ७ मा कस्तो कार्यक्रम गर्ने भन्ने विषयमा कुनै कुरा स्पष्ट पार्न सकेको छैन ।’