पार्टी एकता सरेको हो कि टरेको ? प्रचण्ड र भारतीय राजदूतहरूको रहस्यमय बैठक

Posted on: May 07, 2018 | views: 647

काठमाडौं । बहुप्रतिक्षित एमाले र माओवादी केन्द्रबीचको एकीकरण कहिले होला ? यसबारे नेपाली जनता बिलखबन्दनमा परेका छन् नै । यी दुई पार्टीका नेता कार्यकर्ताहरू समेत अलमलमा देखिन्छन् ।
एकताका शूत्रधार नेताहरू छिटै एकता हुने सन्देश दिइरहेका छन् । पार्टी एकता सरेको हो कि टरेको हो भन्ने जिज्ञासामा एकीकरणका कार्यदलमा खटिएका एक नेताले भने, ‘एकता टरेको छैन, एकीकरणलाई फाइनल दिँदैछौँ ।’

एकीकरण मिति किन सरिरहेको छ त भन्ने प्रश्नको जवाफमा उनले भने, ‘नेताहरूको व्यवस्थापन र केन्द्रीय समितिको संख्या निर्धारण गर्ने वित्तिकै एकता घोषणा गर्छौं ।’ साँघु साप्ताहिकले समाचार छापेको छ ।

तर, एकता निश्चित भएपनि एकता हुने मिति अनिश्चित देखिन्छ । वाम एकता हुन नदिने देशी–विदेशी षड्यन्त्रलाई एमाले अध्यक्ष केपी ओली र माओवादी केन्द्रका अध्यक्ष प्रचण्डले पन्छाउँदै नेपाले कम्युनिस्ट पार्टी निर्माण गर्न कति दिन, कति हप्ता, कति महिना वा कति वर्ष लगाउने हुन् ? सर्वत्र चासोको विषय बनेको छ ।

डोल्पा जिल्लाको रहस्यमय भ्रमण सकेर काठमाडौं फर्किएका नयाँ दिल्लीको १२ बुँदे सम्झौताका रचनाकार तथा नेपालका लागि पूर्वभारतीय राजदूतहरू श्याम शरण, रञ्जित रे र देव मुखर्जीले वैशाख ११ गते प्रचण्डलाई भेटेर ३ घण्टा लामो छलफल गरे लगत्तै यसअघि पार्टी एकताबारे अनेक अत्तो थाप्दै आएका प्रचण्डले एकता गरिहाल्ने प्रचार गर्नुलाई रणनीतिक विश्लेषकहरूले विशेष अर्थपूर्ण रहस्यमयरुपमा लिएका छन् ।

स्रोतका अनुसार भारतीय प्रधानमन्त्री नरेन्द्र मोदीको नेपाल भ्रमण अगाडि एकता गर्दा नेपालमा इण्डियन फ्याक्टरको कारण एकता भएको नकारात्मक सन्देश जाने हो कि भनेर मोदीको भिजिट समाप्ति लगत्तै एकता गर्ने आन्तरिक गृहकार्य भएको एकता कार्यदलका एक सदस्यले बताए ।