काँग्रेसका सांसद उम्मेदवार गुण्डा नाइके गणेश लामाले सफाइ पाए

Posted on: January 16, 2018 | views: 729

काठमाडौं ।
ज्यान मुद्दामा प्रदेस सांसद दीपक मनाङ्गेलाई ५ वर्ष जेल सजाय सुनाएको सर्वोच्च अदालतले गुण्डा नाइके गणेश लामासहित चार जनालाई सफाइ दिएको छ ।

सर्वोच्च अदालतले ज्यान मुद्दामा दीपक मनाङ्गेलाई ५ वर्ष जेल सजाय सुनाएको छ भने काभ्रेबाट प्रदेश सांसद उम्मेदवार बनेका गुण्डा नाइके गणेश लामासहित चार जनाले सफाइ पाएका हुन् ।

दीपक मनाङ्गेको समूहमाथि ०६१ सालमा मिलन चक्रेलाई तरबार हानेको मुद्दा परेको थियो ।

जिल्ला अदालत काठमाडौंले मनाङ्गेलाई २ वर्ष जेल सजाय सुनायो भने गणेश लामा, रेवत कार्की, रमेश सुनुवार र उमेश लामालाई सफाइ दियो ।

जिल्ला अदालतको फैसलाविरुद्ध सरकारी वकिलको कार्यालय पुनरावेदन अदालत गएको थियो ।

अदालतले यसलाई ज्यानमुद्दा भन्दै मनाङ्गेलार्इ ५ वर्ष जेल सजाय सुनायो भने अरुलाई सफाइ दिने जिल्ला अदालतको फैसलालाई सदर गर्‍यो ।

गणेश लामालाई नेपाली काँग्रेसले प्रदेशसभा उम्मेदवार बनाएको थियो । गुण्डा नाइके भनेर चिनिएका गणेश लामालाई कांग्रेस संसदीय बोर्डले काभ्रे क्षेत्र नम्बर १ को ख को टिकट दिएको हो ।

लामा विरुद्ध विशेष अदालतमा सम्पत्ति शुद्धीकरणको मुद्दा चलिरहेको छ । लामाको काभ्रेली समूह काठमाडौं सहितका क्षेत्रमा असुली तथा अपहरण लगायतका घटनाहरुमा संलग्न हुने गरेको छ

विजय गच्छदार नेतृत्वको फोरम लोकतान्त्रिकसगै लामा पनि कांग्रेसमा प्रवेश गरेका थिए ।