काँग्रेसले सरकार नछाडने अनि आयोगले मत परिणाम सार्वजनिक नगरेकोमा एमाले आक्रोस

Posted on: December 29, 2017 | views: 46
भक्तपुर । नेकपा एमालेले छिटो भन्दा छिटो समानुपातिक तर्फको निर्वाचन परिणाम सार्वजनिक गर्न निर्वाचन आयोगको ध्यानाकर्षण गराएको छ । बिहिबार बालकोट स्थित एमाले अध्यक्ष केपी शर्मा ओलीको निवासमा उहाँकै अध्यक्षतामा बसेको स्थायी कमिटी बैठकले निर्वाचन परिणाम सार्वजनिक गरी सरकार निर्माणको प्रकृया सहज गराउन आयोगको ध्यानाकर्षण गराउने निर्णय गरेको एमाले सचिव तथा प्रचार बिभाग प्रमुख योगेश भट्टराईले बताउनुभयो । समानुपातिक तर्फको निर्वाचन परिणाम घोषणा नहुनु दुखद भएको ठहर गर्दै बैठकले यसकै कारण सरकार निर्माणमा अन्यौल गराएको प्रति निर्वाचन आगोगको ध्यानाकर्षण गराएको उहाँले बताउनुभयो ।यसका लागि निर्वाचन आयोग समक्ष पार्टी प्रतिनिधि मण्डलले कुरा गर्ने बैठकले निर्णय गरेको छ । नयाँ सरकार निर्माण,माओबादी केन्द्रसँगको पार्टी एकता र राष्ट्रिय सभा गठनका बिषयमा पार्टी एकता संयोजन समितिको बैठक छिट्टै बसी टुंग्याउने बारे बैठकमा छलफल भएको छ ।बैठक पछि संचारकर्मीसँग कुरा गर्दै सचिब भट्टराईले भन्नुभयो ,छिट्टै नेकपा एमाले र माओबादीबीच पार्टी एकता हुन्छ ,यस क्रममा माओबादी केन्द्रका अध्यक्ष पुष्पकमल दाहाल प्रचण्डसँग सकारात्मक कुराकानी भएको बारे अध्यक्ष ओलीले आजको बैठकमा जानकारी गराउनुभएको छ । उहाँले पार्टी एकता संयोजन समितिको बैठक भोली या पर्सी बसेर एकता प्रकृयाका अरु सांगठनिक र राजनैतिक नेतृत्व ब्यबस्थापन लगायतका कुरा छलफल गरी टुंगो लगाउने बिश्वास ब्यक्त गर्नुभयो । बैठकले प्रदेश सभामा पार्टीको तर्फबाट समानुपातिकमा जाने ७५ जनाको सुचिको अन्तिम टुंगो लगाएको छ र सो सुचि भोली निर्वाचन आयोगमा बुझाउने बताउँदै सचिब भट्टराईले एमालेको प्रदेश सभामा प्रत्यक्षबाट १६८ जना र समानुपातिक तर्फबाट ७५ जना गरि २४३ जना सदस्यले प्रदेश सभामा प्रतिनिधित्व गर्ने बताउनुभयो । दिउँसो डेढ बजेदेखि करीब ५ घण्टा सम्म चलेको बैठकमा अध्यक्ष ओली,बरिष्ठ नेता झलनाथ खनाल ,माधव नेपाल ,उपाध्यक्ष बामदेब गौतम ,भीम रावल ,महासचिब ईश्वर पोखरेल,सचिब प्रदिप ज्ञवाली लगायत अधिकांश स्थायी कमिटीका नेताहरुको सहभागिता रहेको थियो ।