राष्ट्रियसभा गठनका लागि दलहरुबीच सहमति र सहकार्य जरुरी : राष्ट्रपति

Posted on: December 24, 2017 | views: 129
काठमाडौं । राष्ट्रपति विद्यादेवी भण्डारीले राष्ट्रियसभा गठनका लागि दलहरुबीच सहमति र सहकार्य जरुरी रहेको बताउनुभएको छ । राष्ट्रपति कार्यालय, शीतल निवासमा संघीय समाजवादी फोरम नेपालका अध्यक्ष उपेन्द्र यादव र सहअध्यक्ष राजेन्द्र श्रेष्ठसँगको भेटमा उहाँले संविधान र कानूनअनुसार राष्ट्रियसभाको निर्वाचन गर्नका लागि दलहरु मिलेर जानका लागि आह्वान गर्नुभयो । संघीय फोरमका नेताहरुसँग राष्ट्रपतिले अध्यादेशका बारेमा देखिएको विवादको समाधान मुख्य दलहरुले सहमतिका साथ गर्नुपर्ने सुझाव दिनुहुँदै निकासका लागि गम्भीर भएर अघि बढ्न आग्रह गर्नुभएको जानकारी राष्ट्रपतिका मूख्य स्वकीय सचिव भेषराज अधिकारीले दिनुभयो । राष्ट्रपति भण्डारीले अध्यादेशका सम्बन्धमा यथाशक्य निकास निकाल्न आफुले दलका नेताहरुसँग परामर्श गरिरहेको जानकारी संघीय फोरमका नेताहरुलाई गराउनुभएको थियो । भेटका अवसरमा राष्ट्रपति भण्डारीले निर्वाचनमा पाएको सफलताका लागि संघीय फोरमका नेताहरुलाई बधाईं पनि दिनुभएको थियो । राष्ट्रियसभा गठन सम्बन्धी अध्यादेशलाई लिएर प्रमुख राजनीकि दलहरुबीच मतान्तर बढ्दै गएपछि राष्ट्रपतिले विभिन्न दलका नेताहरुसँग परामर्श गर्दै आउनुभएको छ ।