चितवनमा १०४ जना उम्मेदवार, प्रचण्ड बिरुद्ध १७ जनाको उम्मेद्धारी (भिडियो सहित)

Posted on: November 03, 2017 | views: 249

चितवन ।

प्रतिनिधिसभा र प्रदेशसभाको निर्वाचनका लागि चितवनमा आज १०४ जनाको उम्मेदवारी परेको छ ।

चितवनको मुख्य निर्वाचन अधिकृतको कार्यालयका सहायक निर्वाचन अधिकृत गम्भिर घिमिरेका अनुसार जिल्लाको तीन निर्वाचन क्षेत्रको ९ जनाका लागि १०४ जनाको उम्मेदवारी परेको हो ।

नेकपा माओवादी केन्द्रका अध्यक्ष पुष्पकमल दाहालले उम्मेदवारी दिनुभएको चितवन निर्वाचन क्षेत्र नम्बर तीनमा प्रतिनिधिसभातर्फ सबैभन्दा बढी १८ जनाले उम्मेदवारी दिएका छन् । जसमा ८ जना स्वतन्त्रबाट उम्मेदवारी परेको छ ।

यस्तै प्रदेशसभातर्फ (क) र (ख) मा ८, ८ जनाको उम्मेदवारी परेको छ । एमाले नेता तथा पुर्व अर्थमन्त्री सुरेन्द्र पाण्डेको उम्मेदवारी परेको चितवन क्षेत्र नम्बर १ मा ४ स्वतन्त्र सहित १५ जनाको उम्मेदवारी परेको जनाईएको छ ।

सो क्षेत्रको प्रदेशसभा अन्तरगत (क) र (ख) मा क्रमश १०, १० जनाको उम्मेदवारी परेको छ । यस्तै क्षेत्र नम्बर २ मा ३ स्वतन्त्र सहित १५ जनाको उम्मेदवारी परेको घिमिरेको भनाई छ ।

प्रदेशसभातर्फ सो क्षेत्रको (क) मा ९ र (ख)मा ११ जनाको उम्मदवारी परेको उहाँले जानकारी दिनुभयो ।

बाम गठबन्धनबाट चितवन क्षेत्र नम्बर १ मा सुरेन्द्र पाण्डे, २ मा कृष्णभक्त पोखरेल र क्षेत्र नम्बर तीनमा पुष्पकमल दाहालले उम्मेदवारी दिनुभएको छ ।

यस्तै लोकतान्त्रिक गठबन्धनबाट क्षेत्र नम्बर १ का राजेन्द्र बुर्लाकोटी , क्षेत्र नम्बर २ बाट शेषनाथ अधिकारी र क्षेत्र नम्बर तीनबाट राप्रपा प्रजातान्त्रिकका बिक्रम पाण्डेले उम्मेदवारी दिनुभएको छ ।

निर्वाचन कार्यतालिका अनुसार आज शुक्रबार दावी विरोध, शनिवार दर्ताको निर्णय हुने तथा १९ गते नामावली फिर्ताको समय रहने र सोही दिन नै निर्वाचन चिन्ह प्रदान हुने घिमिरेले जानकारी दिनुभयो