उदयपुरमा ६ जनाको लागि ६२ जनाले दिए उम्मेद्धारी, यस्ता छन् उम्मेद्धारहरु

Posted on: November 03, 2017 | views: 114

उदयपुर ।

आसन्न मंसिर २१ हुने प्रतिनिधि तथा प्रदेश सभाका निर्बाचनका लागि दोस्रोचरणमा उदयपुरमा मनोनयन दर्ता शान्तिपूर्वक विहिबार सम्पन्न भएको छ । 

२ प्रतिनिधि सभा र ४ प्रदेश सभा रहेको उदयपुरमा प्रतिनिधिसभातर्फ २३ र प्रदेशसभातर्फ ३९ गरी ६२ जनाको उम्मेदवारी मनोनयन दर्ता भएको मूख्य निर्वाचन अधिकृत तेजेन्द्रप्रसाद शर्माले बताएका छन् छ । विभिन्न १६ राजनीतिक दल र ६ जना स्वतन्त्रबाट उम्मेदवारी परेको हो ।

प्रतिनिधि सभा क्षेत्र नं. १ मा १२ जनाको उम्मेदवारी परेको छ । जसमा नेपाली कांग्रेसको तर्फबाट डा. नारायण खड्का, बाम गठबन्धनको तर्फबाट नेकपा एमालेकी मञ्जुकुमारी चौधरीले मनोनयन दर्ता गराएका छन् । त्यस्तै संघीय समाजवादी फोरम नेपालबाट गोपाल राई, नेपाल कांंग्रेस (विपि)बाट प्रशान्त राई, देशभक्त जनगणतान्त्रिक मोर्चा नेपालबाट अम्बरबहादुर परियार, एकीकृत राप्रपा राष्ट्रवादीबाट कनकबहादुर रानामगर, राप्रपा प्रजातान्त्रिकबाट गोविन्दबहादुर बस्नेत, नेकपा माक्सवादीबाट गम्भिरबहादुर कार्की, नयाँ शक्ति पार्टी नेपालबाट विश्वराज राई, राजपा नेपालबाट राजेन्द्र राई, संघीय लोकतान्त्रिक राष्ट्रिय मञ्चबाट कसिककुमार राई र नेकपा मालेबाट रामप्रसाद चौलागाईले उम्मेदवारी दिएका छन् । 

त्यसैगरी प्रतिनिधि सभा क्षेत्र नं. २ मा १ स्वतन्त्रसहित ११ जनाको उम्मेदवारी दर्ता भएको छ । नेपाली कांग्रेसको तर्फबाट नारायण कार्की, नेकपा माओवादी केन्द्रबाट सुरेश कुमार राई (हिमाल), नेकपा एमालेबाट जगन्नाथ खतिवडाले उम्मेदवारी दिएका छन् । त्यस्तै संघीय समाजवादी फोरम नेपालबाट विष्णुबहादुर राई दनुवार, नेपाल मजदुर किसान पार्टीबाट नयन बहादुर कार्की, राप्रपा राष्ट्रवादीबाट गोपी गिरी, नयाँ शक्ति नेपालबाट खम्बराज खत्री, मंगोल नेशनल अर्गनाईजेशनबाट खड्गबहादुर किरिङ मगर, राजपाबाट उपेन्द्र राई र नेकपा माक्सबादीबाट शंकरकुमार राईले उम्मेदवारी दर्ता गराएका छन् । स्वतन्त्र उम्मेदवारी दिनेमा दिवस कटुवाल छन् । उनी नेकपा माओवादी केन्द्र उदयपुरको जिल्ला संयोजक हुन् ।

त्यसैगरी प्रतिनिधि सभा क्षेत्र नं. १ अन्तर्गतको प्रदेश सभा क्षेत्र नं. १ मा एक स्वतन्त्रसहित १० जनाको उम्मेदवारी परेको छ । जसमा नेपाली कांग्रेसको तर्फबाट विदुर बस्नेत, बाम गठबन्धनको तर्फबाट नेकपा एमालेका विमल कार्कीले उम्मेदवारी दिएका छन् । त्यस्तै संघीय समाजवादी फोरम नेपालको तर्फबाट गणेशकुमार राई, जनसमाजवादी पार्टीबाट मनकुमार राई, नेपाल संघीय समाजवादी पार्टीबाट दिनेश राई, नयाँ शक्ति पार्टी नेपालबाट सोजसिंह कार्की, राप्रपा प्रजातान्त्रिकबाट रामप्रसाद गिरी, राप्रपाबाट चन्द्रबहादुर विष्ट, राजपा नेपालबाट खिसाबहादुर राई र स्वतन्त्रबाट कुशलबाबु बस्नेतले उम्मेदवारी दर्ता गराएका छन् । स्वतन्त्र उम्मेदवार बस्नेत नेकपा एमाले उदयपुरका जिल्ला सदस्य हुन् । 

प्रतिनिधिसभा क्षेत्र नं. १ अन्तर्गतको प्रदेश सभा क्षेत्र नं. २ मा दुई स्वतन्त्रसहित १४ जनाको उम्मेदवारी दर्ता भएको छ । जसमा नेपाली कांग्रेसको तर्फबाट हिमाल कार्की, बाम गठबन्धनको तर्फबाट नेकपा माओवादी केन्द्रका रामबहादुर थापाको उम्मेदवारी परेको छ । त्यस्तै संघीय समाजवादी फोरम नेपालबाट प्रदिपकुमार चौधरी, देशभक्त जनगणतान्त्रिक मोर्चा नेपालबाट शंकरबहादुर पौडेल, संघीय खम्बुवान लोकतान्त्रिक पार्टी नेपालबाट राजकुमार राई, एकिकृत राप्रपा राष्ट्रबादीबाट नारायणबहादुर थापा, राष्ट्रिय जनमोर्चाबाट गंगध्वज कार्की, राप्रपाबाट श्यामकुमार तामाङ, नेकपा माक्सबादीबाट रामकुमार थापा, राप्रपा प्रजातान्त्रिकबाट बिरेन्द्रकुमार अधिकारी, नयाँ शक्ति पार्टी नेपालबाट राजनकुमार दनुवार र राजपा नेपालबाट सूर्यनारायण साह तेलीको मनोनयन दर्ता भएको छ । स्वतन्त्र उम्मेदवार दर्ता गराउनेहरुमा मिनबहादुर ज्यू ठकुरी र जीवनकुमार कार्की रहेका छन् । ठकुरी र कार्की दुबै नेकपा माओवादी केन्द्रका जिल्ला नेता हुन् ।

त्यसैगरी प्रदेश नं. २ अन्तर्गत प्रदेशसभा क्षेत्र नं. १ मा दुई स्वतन्त्रसहित ८ जनाको उम्मेदवारी परेको छ । नेपाली कांग्रेसको तर्फबाट भेषबहादुर थापामगर, बाम गठबन्धनको तर्फबाट नेकपा माओवादी केन्द्रकी भेषकुमारी राउतको उम्मेदवारी दर्ता भएको छ । त्यस्तै अन्य दलहरु राप्रपाबाट सुवासराज शाही ठकुरी, नयाँ शक्ति पार्टी नेपालबाट अरुणकुमार राई, राप्रपा प्रजातान्त्रिकबाट विष्णुबहादुर बस्नेत र संघीय समाजवादी फोरमबाट शिवहाङ राई रहेका छन् । स्वतन्त्रमा नारायण बहादुर मगर र हुमबहादुर दाहालको उम्मेदवारी परेको छ । मगर नेकपा माओवादी केन्द्रका जिल्ला सहइन्चार्ज हुन भने दाहाल नेकपा एमाले उदयपुरका जिल्ला नेता हुन् । 

प्रदेश नं. २ अन्तर्गत प्रदेशसभा क्षेत्र नं. २ मा ७ जनाको उम्मेदवारी परेको छ । जसमा नेपाली कांग्रेसको तर्फबाट रामकुमार खत्री, बाम गठबन्धनको तर्फबाट नेकपा एमालेकी कला घले, नेमकिपाबाट चन्द्रबहादुर कार्की, राप्रपाबाट सुरेन्द्रकुमार थापा, राप्रपा (प्रजातान्त्रिक) बाट माला तामाङ, संघीय समाजवादी फोरमबाट यसकुमार राई र नयाशक्ति पार्टीबाट ओषण घिमिरेको उम्मेदवारी दर्ता भएको छ ।

मुख्य निर्वाचन अधिकृत शर्माले मनोनयन दर्ता कार्यक्रम शान्ति र सौहाद्रपूर्ण वातावरणमा सम्पन्न भएको बताए । राजनीतिक दलहरुले समयतालिका अनुरुप उपस्थिति जनाइदिनुका साथै जुलुसमा सहभागि कार्यकर्तालाई बाहिरै व्यवस्थित गरेकाले र कर्मचारीहरुको सक्रिय खटाइका कारण सहजढंगले मनोनयन दर्ता कार्यक्रम सम्पन्न भएको उनले बताए  । 

कांग्रेस, एमाले, माओवादी केन्द्रले र्यालीसहित उम्मेदवारी दर्ता गराएका थिए । उत्साहपूर्वक कार्यकर्ताको सहभागिता रहेको र्यालीले गाईघाट बजार परिक्रमा गरी आँखा हस्पिटल, जिल्ला हस्पिटल चौक, जिल्ला प्रहरी कार्यालय अगाडी हुदै जिल्ला समन्वय समिति उदयपुरमा रहेको मूख्य निर्वाचन अधिकृतको कार्यालय र निर्वाचन अधिकृतको कार्यालयमा पुगेर उम्मेदवारी दर्ता गराएका थिए ।