नारायणकाजीको चुनावी भाषण-'चुनाव जितेर बामपन्थीको सरकार बनाएर सम्बृद्धि ल्याउँछौं'

Posted on: October 30, 2017 | views: 226

गोरखा ।

बामगठबन्धनबाट गोरखा २ का उमेद्वार तथा माओबादी केन्द्रका नेता नारायणकाजी श्रेष्ठले मंसीर १० गते हुने प्रतिनिधिसभा र प्रदेशसभा निर्वाचन जितेर बामपन्थीहरुको नेतृत्वमा सरकार बनाउँदै देशलाई सम्बृद्धिको दिशामा लगिने बताउनु भएको छ ।

चुनावी घरदैलोका क्रममाः आज गोरखाको पालुङटारमा प्रदेशसभा कार्यालय उद्घाटन गर्दै श्रेष्ठले बाह्य हस्ताक्षेप सदाका लागि अन्त्य गर्न एमाले र माओबादी केन्द्रबीच गठबन्धन गर्दै एउटै कम्युनिष्ट केन्द्र बनाउने दुई पार्टीबीच निर्णय भएको बताउनुभयो । कम्युनिष्टहरु थप शसक्त हुन आसन्न चुनावले सहयोग पुग्ने श्रेष्ठको भनाइ छ ।

उहाँले भन्नुभयो, ‘समाजबाद उन्मुख राज्य खडा गर्ने, देशलाई स्वाधिन बनाउँदै सबृद्धिको दिशातर्फ अघि बढाउने, जनताको बिकासप्रतिको आशा तथा अपेक्षा पूरा गर्ने र बिश्वले देख्ने गरी नमूना समाजबादको आधार खडा गर्न यो चुनाव महत्वपूर्ण हुनेछ ।’ माओबादी र एमालेले कसरी साझा उमेद्वारलाई जिताउन सकिन्छ भन्नेबारे सोच्नुपर्ने बेला आएको भन्दै श्रेष्ठले एकिकृत कम्युनिष्ट पार्टी बनाउँदै कम्युनिष्टहरुले चुनावमा जितेपछि सरकार बनाउने दावी गर्नुभएको छ ।

श्रेष्ठले भन्नुभयो, ‘देशमा कम्युनिष्टहरुको मत दुई तिहाइ छ । कम्युनिष्टहरुकै पक्षमा जनताको समर्थन छ । तर नेतृत्व र सरकार भने प्रतिक्रियाबादीले चलाइरहेका छन् । गरिबी, बेरोजगारी समस्या समाधान गर्न पनि बामपन्थीको सरकार आवश्यक छ ।’