झापा ३ सिटौलाले नछाडेपछि राप्रपा महामन्त्रीद्धारा कांग्रेससँगको गठबन्धन टुटेको घोषणा

Posted on: October 30, 2017 | views: 397

झापा ।

झापा क्षेत्र नं. ३ को प्रत्यक्ष निर्वाचनमा राप्रपाका महामन्त्री राजेन्द्र लिङ्देनलाई सघाउने आश्वासन दिएको काँग्रेसले अन्तिम समयमा नेता कृष्ण सिटौलालाई उठाउने निर्णय गरेपछि कांग्रेस–राप्रपा गठबन्धन टुट्ने भएको छ ।


सिटौला लोकतान्त्रिक गठबन्धनबाट झापा ३ मा उम्मेदवार बन्ने भएपछि गाउँमा भोट माग्दै हिँडेका लिङ्देनले गठबन्धन टुटेको घोषणा गर्दै चुनावी प्रचार तिव्रपारेका छन् ।


राप्रपा नेता लिङदेनले अब कांग्रेससँगको देशव्यापी गठबन्धन पनि लगभग टुटिसकेको भन्दै आइतबार राति ट्वीट गर्दै झापा–३ मा आफूले दिएको उम्मेदवारी कायमै रहेको जनाएका छन् । उनले कांग्रेससँगको गठबन्धन टुटेकोसमेत प्रष्ट पारेका छन् ।


राप्रपा महामन्त्री लिङदेनले कांग्रेससँग गठबन्धन टुटेको बताए पनि पार्टीले औपचारिकरुपमा कांग्रेससँगको गठबन्धन टुटेको औपचारिक घोषणा गरिसकेको छैन ।


यसअघि कांग्रेसले झापा ३ मा राप्रपाका महामन्त्री लिङ्देनलाई समर्थन गर्दै सिटौलालाई समानुपातिकमा राखेको थियो । तर, सिटौलाले समानुपातिकमा नबस्ने चेतावनी देउवालाई दिएपछि राप्रपासँगको सहमती तोड्दै काँग्रेसले सिटौलालाई उम्मेद्धार बनाउने निर्णय हिजो गरेको थियो ।