'बाँदरमुढे नरसंहारको लागि उतिबेलै माफि मागीसकें, सबै उम्मेदवारको टुंगो आजै' - प्रचण्ड

Posted on: October 30, 2017 | views: 245

चितवन ।

नेकपा (माओवादी केन्द्र) का अध्यक्ष पुष्पकमल दाहाल, प्रचण्डले आज वेलुकासम्ममा सबै क्षेत्रका उम्मेदवारको टुंगो लाग्ने बताउनुभएको छ । चितवनको भरतपुरमा आज प्रेस सेन्टर र प्रेस चौतारी नेपालको संयुक्त पत्रकार सम्मेलनमा बोल्दै अध्यक्ष प्रचण्डले नेपालका ८,१० स्थानमा उम्मेदवारको टुंगो लाग्न बाँकी भएको भन्दै बेलुकासम्ममा टुंगो लाग्ने बताउनुभयो । 


पत्रकारसम्मेलनमा अध्यक्ष प्रचण्डले भन्नुभयो, ‘छलफल चलिरहेको छ, जटिल भएर पनि हैन, समय असाध्यै चाप भएर हो, सम्भवत आज बेलुका मेरो र नेकपा एमाले अध्यक्ष केपी ओलीको बैठक छ, त्यो बैठकबाट टुंगो लाग्छ ।’ उहाँले चुनावको बारेमा आशंका लिनुपर्ने आवश्यकता नरहेको समेत दावी गर्नुभयो ।


बाम गठबन्धनको विषयमा सोधिएको प्रश्नमा अध्यक्ष प्रचण्डले हरेक पार्टीले आआफ्नै हितलाई प्राथमिकता दिएर तालमेल गर्ने गरेको भएपनि अहिलेको बाम गठबन्धन भने फरक रहेको उल्लेख गर्नुभयो । ‘अहिलेको नयाँ कुरा भन्या के हो भने बाम एकता र गठबन्धन गर्ने जो प्रयास गरिएको छ, यो अली बढी बैचारिक र राजनीतिक पक्ष अवश्य छ’, उहाँले भन्नुभयो । 


सम्बाद सहकार्यको हिसाबले अहिले पनि सरकारमा रहेको र काँग्रेससँग सहकार्य तोडिई नसकेको भन्दै प्रचण्डले बाम एकता अहिलेको नयाँ विशेषता भएको जिकिर समेत गर्नुभयो । एकता गर्ने उद्देश्यका साथ नै सहमती गरिएको उहाँले बताउनुभयो । आगामी निर्वाचनको मतपरिणामले समेत कुनै असर नगर्ने दावी प्रचण्डको छ । उहाँले देशको राजनीतिक आवश्यकताले, ऐन संविधानले समेत थोरै पार्टी हितमा छ भन्ने परिकल्पना गरेको समेत बताउनुभयो । 


ठुला थोरै पार्टी रहने प्रक्रियाको शुरुआत माओवादी र एमालेले गरेको उहाँको भनाई थियो । ‘काँग्रेसमा पनि त्यो शुरुआत भएको छ,यो राष्ट्रिको हितमा हुन्छ यो जनताको हितमा हुन्छ भनेर बुझ्नु उचित छ,’ प्रचण्डको भनाई थियो । उहाँले चितवन आफ्नो जिल्ला भएको नाताले चितवनका जनताको विश्वास लिएर देशको नेतृत्व गर्ने तयारीमा रहेको प्रष्ट्याउनुभयो । चितवनका जनताले यो ऐतिहासिक अबसरलाई त्यही रुपमा बुझ्ने उहाँले विश्वास व्यक्त गर्नुभयो । 


बाँदरमुढे घटनाको विषयमा सोधिएको प्रश्नमा अध्यक्ष प्रचण्डले घटना भएको भोलीपल्टै माफी समेत मागिसकेको र बाँदरमुढे घटना पिडितहरुलाई यसअघि पनि सम्बोधन र सहयोग समेत गरेको दावी गर्नुभयो । सो घटनाका दोषिलाई पार्टीभित्र कारवाही समेत भैरहेको उहाँले जिकिर छ । ‘चितवनको जनतालाई पनि, देशभरी र दुनियाँभरीको जनतालाई नी के थाहा छ भने बाँदरमुढे घटना घट्ने वित्तीकै मैले भोलीपल्ट नै गल्ती भयो क्षमायाचना गर्दै जनतासँग बक्तव्य निकालेको थिएँ र संयुक्त राष्ट्रसंघलाई पनि थाहा छ ।’ प्रचण्डको कथन थियो ।