देउवाले पछि हट्दै सिटौलालाई प्रत्यक्ष चुनावकै टिकट दिए

Posted on: October 29, 2017 | views: 337

काठमाडौं ।

समानुपातिक सांसदमा नाम राखेपछि पार्टी सभापती शेरबहादुर देउवासँग असन्तुष्ट रहँदै आएका नेता कृष्णप्रसाद सिटौलाले अन्तत प्रत्यक्ष चुनावमै लड्न टिकट पाएका छन् ।


सिटौला पक्षका नेताहरुको चर्को दबावपछि पार्टीले उनको नाम समानुपातिक सूचीबाट झिकेर प्रत्यक्ष उम्मेदवार बनाउने निर्णय गरेको हो ।


सिटौला मंसिरमा हुने चुनावमा प्रतिनिधिसभाका लागि उम्मेदवार बन्ने निश्चित भएको हो । 


सिटौलाले आफ्नो पुरानो निर्वाचन क्षेत्र झापा ३ बाट सातौं पटक चुनाव लड्न लागेका हुन् । यसअघि पार्टीले उनको नाम समानुपातिक सूचीको पहिलो नम्बरमा राखेर निर्वाचन आयोगलाई बुझाएको थियो । तर, सिटौलाको तीव्र असन्तुष्टि, कार्यकर्ताको चौतर्फी दबाबका कारण पार्टीले आइतबार उनको नाम समानुपातिक सूचीबाट हटाएको हो ।


सिटौलालाई प्रत्यक्षबाटै उम्मेदवार बनाउने निर्णय शुक्रबार बसेको कांग्रेस संसदीय समितिको बैठकमा भएको थियो । तर, गठबन्धनमा असर पर्ने भन्दै सार्वजनिक गरिएको थिएन । लोकतान्त्रिक गठबन्धनअन्तर्गत झापा ३ राष्ट्रिय प्रजातन्त्र पार्टी 'राप्रपा'ले माग गर्दै आएको थियो । उक्त क्षेत्रबाट राप्रपाले महामन्त्री राजेन्द्र लिङ्देनलाई उम्मेदवार बनाउने बताउँदै आएको थियो । तर, सिटौलाले क्षेत्र छाड्न नमानेपछि पार्टी सभापति शेरबहादुर देउवा पछि हटेको कांग्रेस स्रोतको भनाइ छ ।


पार्टीले नाम समानुपातिकमा राखे पनि सिटौलाले आफ्नो क्षेत्रमा चुनावको तयारी दुई साता अघिदेखि नै सुरु गराइसकेका थिए ।


पार्टीभित्र शीर्ष वरीयतामा रहेका सिटौला रणनीतिक नेताका रुपमा चिनिन्छन् । सिटौला नेपाली काँग्रेसभित्र भारत निकट नेता मानिन्छन् उनी करोडौं रुपैयाँको सुडान घोटाला काण्डका समयमा गृहमन्त्री भएका विवादास्पद नेता समेत हुन् ।