बाबुरामको नयाँ शक्तिका नेता मदन राईले भोट फकाउन तरकारीको बिउ बाँडे

Posted on: October 27, 2017 | views: 353

काठमाडौं ।

निर्वाचनको मुखमा पारेर बाबुराम भट्टराई नेतृत्वको नयाँ शक्ति पार्टीका नेताले आफ्नो चुनावी क्षेत्रमा तरकारीको बिउ बाँडेका छन् ।


आगामी मंसिर १० गते हुने निर्वाचनमा नयाँ शक्ति नेपालबाट खोटाङमा उम्मेदवार बनेका मदन राईले तरकारीको बीउ दिएर भोट माग्न सुरू गरेका हुन् ।


गत कात्तिक ५ गते प्रतिनिधिसभा निर्वाचनका लागि उम्मेदवारी दर्ता गरेर चुनावी अभियानमा लागेका राईले जिल्लाका हरेक स्थानीय तहमा आफ्ना कार्यकर्ता खटाएर रायो, मूला र केराउको बीउ बाँड्न लगाएका छन् ।


तरकारीको बीउ लिएर जनताको घरदैलोमा पुगेका कार्यकर्ताले राईको चुनावी घोषणापत्रसमेत बाँड्ने गरेका छन् । बीउ र घोषणापत्रसँगै प्याकिङ गरिएको प्लाष्टिकको पोकोमा ‘मदन राई को हो ?’ शीर्षकको राईको जीवनीसमेत राखिएको छ ।


झण्डै महिना दिनअघिदेखि चुनावी प्रचारमा लागेका राईले आचारसंहिताविपरीत जनतालाई प्रलोभनमा पार्न तरकारीको बीउ वितरण गरेको अन्य दलले आरोप लगाएका छन् ।


जिल्लाबाट प्रतिनिधिसभाका लागि नयाँ शक्तिका उम्मेदवार राईसँगै विभिन्न राजनीतिक दलका १० जनाको उम्मेदवारी परेको छ । कृषि क्षेत्रको विज्ञ मानिएका राईले भने चुनावको संघारमै मतदातालाई प्रभावित पार्न तरकारीको बिउ बाँड्नुलाई जनतालाई आत्मनिर्भर बनाउन यसो गरेको जिकिर गरेका छन् ।


राईले वितरण गर्न लगाउनुभएको तरकारीको बीउको प्याकेटमा करिब ५०–६० दाना केराउ, १५०–१६० दाना मूला र करिब २०० को हाराहारीमा रायोको बीउको गेडा राखेका छन् ।


भर्खरै नयाँ शक्ति नेपालको राजनीतिमा छिरेका राईलाई जिल्लावासीले उति महत्वका साथ हेरेको पाईदैन भने बाम गठबन्धनबाट उम्मेद्धार बनेका एमालेका विशाल भट्टराई र नेपाली कांग्रेसबाट उम्मेदवार बनेकी सरस्वती बजिमयबीच प्रतिस्पर्धा हुने ठानिएको छ । माओवादी र एमाले गठबन्धनका कारण बाम गठबन्धनका पक्षमा बढी मतदाता देखिएको पाइन्छ ।