बागलुङमा एमाले, माओवादी र जनमोर्चाका ४ जना बागीको उम्मेद्धाद्धारी फिर्ता

Posted on: October 25, 2017 | views: 277

बागलुङ ।

आगामी मंसिर १० गते हुने प्रतिनिधिसभा तथा प्रदेशसभा निर्वाचनको लागि स्वतन्त्र रुपमा उमेदवारी दिएका ४ जनाले उमेदवारी फिर्ता लिएका छन् । मुख्य निर्वाचन अधिकृतको कार्यालयमा उमेदवारी दिएका ३१ जना मध्य ४ जनाले आफ्नो उमेदवारी फिर्ता लिएको मुख्य निर्वाचन अधिकृत प्रकाशप्रसाद पण्डितले बताउनुभयो ।


नेकपा एमाले, माओवादी केन्द्र र राष्ट्रिय जनमोर्चा सम्मिलित बाम गठबन्धन गर्दा उमेदवार छनौटमा कमजोरी देखाएको भन्दै ४ जनाले स्वतन्त्र रुपमा उमेदवारी दिएका थिए । तर उनीहरुले बुधबार मुख्य निर्वाचन अधिकृतको कार्यालयमा गएर उमेदवारी फिर्ता लिएको निर्वाचन अधिकृत विद्याराज पौडेलले बताउनुभयो ।

बागलुङ क्षेत्र नम्बर १ को प्रतिनिधिसभा निर्वाचनको लागि स्वतन्त्र उम्मेदवारी दिएका गंगा थापा, पूर्णबहादुर क्षेत्री पौडेल क्षेत्री र क्षेत्र नम्बर २ को प्रतिनिधिसभा सदस्यको निर्वाचनको लागि उम्मेदवारी दिएका धनबहादुर वि.क. ‘बाबुराम’ र प्रदेशसभा (ख)मा उम्मेदवारी दर्ता गराएका दधिराम शर्माले उम्मेदवारी फिर्ता गरेको मुख्य निर्वाचनको कार्यालय बागलुङले जनाएको छ ।


पार्टीसँगको छलफल र जिल्लामा बाम गठबन्धनलाई बहुमतले जिताउने निर्णय अनुसार उम्मेदवारी फिर्ता गरेको स्वतन्त्र उम्मेदवारी दिएका राष्ट्रय जनमोर्चाका युवा नेता गंग थापाले बताउनुभयो । उनीहरुले उमेदवारी फिर्ता गरेसंगै आगामी चुनावमा २७ जना प्रतिष्पर्धामा उत्रिने भएका छन् ।

बागलुङको प्रतिनिधिसभाका २ निर्वाचन क्षेत्र र प्रदेश सभाका ४ निर्वाचन क्षेत्रमा बामपन्थी गठबन्धन र प्रजातान्त्रिक गठबन्धनबाट उमेदवारी दिएका छन् । नेकपा एमाले, माओबादी केन्द्र, राष्ट्रिय जनमोर्चा गरी ३ शक्तिले दुई दुई सिट लिएर तालमेल गरेका छन् । नेपाली काङ्ग्रेसले आफ्नै उमेदवार उठाएको छ भने राप्रपाले नेपाली काङ्ग्रेसलाई सघाउने भन्दै आफ्नो उमेदवार दिएको छैन ।


बागलुङ जिल्लामा २०६४ सालको संबिधान सभाको निर्वाचनमा नेपाली काङ्ग्रेस, नेकपा एमाले र राष्ट्रिय जनमोर्चाले एक एक सिट र २०७० सालको निर्वाचनमा जिल्लाको ३ सिट नेपाली काङ्ग्रेसले जितेको थियो  ।