काँग्रेस नेता रावलद्धारा पार्टि परित्याग, एमाले माओवादी गठबन्धनलाई सघाउने घोषणा

Posted on: October 25, 2017 | views: 227

बाजुरा ।

बाजुराका प्रभावशालि काँग्रेस जिल्ला नेता तथा नेपाली कांग्रेस बाजुरका पूर्वसभापति मानबहादुर रावलले नेपाली काँग्रेस परित्याग गर्दै बाम गठबन्धनलाई सघाउने घोषणा गरेका छन् ।


गत संविधानसभामा प्रत्यक्ष उम्मेदवार समेत बनेका नेता रावलले आसन्न निर्वाचनमा वामपन्थी गठबन्धनलाई समर्थन जनाउँदै कांग्रेस परित्याग गरेका हुन् ।


बुधवार विज्ञप्ति जारी गरी कांग्रेस नेता रावलले आफूमाथि कांग्रेस नेतृत्वले अन्याय गरेकाले विद्रोह गर्नुपरेको बताए । ‘आफैं अन्यायमा परी अरुलाई न्याय दिन सकिँदैन भन्ने याथर्थलाई आत्मसाथ गरी यो निर्णय लिएको छु’ रावलले भनेका छन् ।


उनले आफू कांग्रेसबाट अलग भए पनि राजनीतिबाट अलग नरहने भन्दै आसन्न निर्वाचनमा बाजुरा जिल्लामा वाम गठबन्धनलाई सघाई राजनीतिक रुपमा अघि बढ्ने निर्णय गरेको बताएका छन् ।


उनले आफ्ना समर्थक र शुभेच्छुकलाई वामपन्थी गठबन्धनलाई सहयोग गर्न आह्वानसमेत गरेका छन् । रावल ०४७ सालदेखि लगातार कांग्रेसको जिल्ला सभापति रहँदै आएका थिए । उनी गत संविधानसभा निर्वाचनमा एमालेका कर्णबहादुर थापासँग थोरै मतान्तरले पराजित भएका थिए ।


यसपटक समेत सांसदका दाबेदार रहेका रावललाई बाइपास गर्दै काँग्रेसले निकटताका आधारमा टिकट वितरण गरेपछि असन्तुष्ट रावल छिट्टै नेकपा एमाले प्रवेश गर्ने तयारीमा छन् ।