विवेकशील साझा पार्टीका प्रवक्ता डा. सूर्यराज आचार्य काठमाडौं २ बाट प्रतिनिधिसभा उम्मेद्धार

Posted on: October 22, 2017 | views: 234

काठमाडौं ।

वैकल्पिक राजनीतिक शक्तिका रुपमा चर्चामा रहेको विवेकशील साझा पार्टीका प्रवक्ता डा. सुर्यराज आचार्य काठमाडौं क्षेत्र नम्वर २ बाट प्रतिनिधिसभामा उम्मेद्धार बन्ने भएका छन् ।


विवेकशील साझा पार्टीले प्रतिनिधिसभाका लागि काठमाडौं क्षेत्र नम्बर २ बाट पार्टी प्रवक्ता रहेका डा. सूर्यराज आचार्यलाई उम्मेदवार बनाउने निर्णय गरेको छ ।


विवेकशिल साझा पार्टीले आचार्यलाई काठमाडौं २ बाट उम्मेद्धार बनाउने निर्णय सार्वजनिक गरेसँगै  बाम गठबन्धनका तर्फबाट पुर्व प्रधानमन्त्री समेत रहेका एमाले वरिष्ठ नेता माधव कुमार नेपाललाई ठूलो चुनौति थपिएको छ ।


बौद्धिक व्यक्तित्वका रुपमा परिचित तथा विज्ञका रुपमा काम गर्दै आएका डा. आचार्यको उम्मेद्धारीपछि काठमाडौं क्षेत्र नम्वर २ मा आचार्य र एमाले नेता नेपालबिच नै प्रतिस्पर्धा हुने ठानिएको छ ।


भारतबाट सिभिल इन्जिनियरिङमा स्नातक, थाइल्याण्डबाट स्रोत व्यवस्थापनमा स्नातकोत्तर तथा जापानको टोकियो विश्वविद्यालयबाट ‘पूर्वाधार र क्षेत्रीय विकासमा विद्यावारिधि गरेका डा.आचार्य सार्वजनिक नीति तथा पूर्वाधार विज्ञका रुपमा चिरपरिचित छन् ।


उनी लामो समय जापानको ‘इन्स्टिच्युट फर ट्रान्सपोर्ट पोलिसि स्टडिज’मा ‘सिनियर रिसर्च फेलो’ र टोकियो विश्वविद्यालयमा अतिथि प्राध्यापकका रूपमा समेत काम गरेका एकमात्र नेपाली विज्ञ हुन् ।


डा. आचार्यले नेपालका पूर्वाधार विकासका विभिन्न महत्वपूर्ण बिषयहरुमा राष्ट्रिय बहसको उठान गरेका थिए । पेशागत जीवनको सुरुमा नेपाल सरकार र संयुक्त राष्ट्रसंघको कार्य अनुभव समेत संगालेका आचार्यका दर्जनौं शोधपत्र प्रकाशित छन् ।


प्रतिनिधिसभाका लागि काठमाडौं क्षेत्र नम्वर २ ले विज्ञ तथा प्राज्ञिक उम्मेद्धार पाएसँगै सो क्षेत्रमा काठमाडौं मेयर निर्वाचनका समयमा समेत साझा र विवेकशिल पार्टीप्रति आस्था राख्ने र समर्थन गर्ने  ठूलो समुहमा रहेका बैकल्पिक राजनीतिक शक्तिको आशा र पक्षमा रहेका काठमाडौंवासी दुई पार्टीको एकिकरणपछि एकसाथ डा. आचार्यलाई उम्मेद्धारको रुपमा पाउँदा उत्साहित देखिएका छन् ।