माओवादीद्धारा देउवालाई दिएको समर्थन र मन्त्री फिर्ता नबोलाउने निर्णय

Posted on: October 14, 2017 | views: 226

काठमाडौं ।

प्रतिपक्षिदल नेकपा एमालेसँग निर्वाचनको लागि गठबन्धन गरेपछि सरकारमा रहन नैतिक संकट परेको बताईदै आएको नेकपा माओवादी केन्द्रले सरकारमा रहेका मन्त्री फिर्ता नबोलाउने निर्णय गरेको छ ।


माओवादी केन्द्रले कांग्रेस सभापति शेरबहादुर देउवा नेतृत्वको सरकारलाई दिएको समर्थन पनि फिर्ता नलिने निर्णय शीर्ष नेता सहभागी बैठकबाट गरेको हो ।


देउवा नेतृत्वको सरकारलाई दिएको समर्थन फिर्ता नलिने र सरकारमा सहभागी मन्त्रीलाई फिर्ता नबोलाउने निर्णय गरेको प्रवक्ता पम्फा भुसालले जानकारी दिएकी छन् ।

  

प्रधानमन्त्री देउवाले एमाले माओवादीले वाम गठबन्धन गरेपछि राष्ट्रिय प्रजातन्त्र पार्टी 'राप्रपा' लाई सरकारमा सहभागी गराउने निर्णय गरेपछिको पछिल्लो राजनीतिक घटनाक्रमको विषयमा छलफल गर्न बसेको माओवादी शीर्ष नेताको बैठकले सरकार नछोड्ने निर्णय गरेको हो ।


बैठकमा मंसिरमा हुने प्रतिनिधिसभा र प्रदेशसभाको चुनाव, पछिल्लो राजनीतिक घटनाक्रम र वाम एकताका विषयमा समेत छलफल भएको छ। पार्टी निर्णय बोकेर माओवादी अध्यक्ष पुष्पकमल दाहाल ‘प्रचण्ड’ केही बेरमा प्रधानमन्त्री देउवालाई भेट्न बालुवाटार जाँदै छन् ।