झलनाथ खनाल र सुवास नेम्वाङले पाए इलामको पुरानै क्षेत्र

Posted on: October 07, 2017 | views: 414

इलाम ।

मंसिरमा हुने प्रतिनिधिसभा र प्रदेशसभा सदस्य चुनावका लागि नेकपा एमाले इलामले पार्टीका वरिष्ठ नेता झलनाथ खनाल र पूर्वसभामुख सुवास नेम्वाङलाई सर्वसम्मत रूपमा सिफारिस गरेको छ ।


एमाले जिल्ला कमिटिले खनाललाई इलाम क्षेत्र नं १ र नेम्वाङलाई २ बाट प्रतिनिधिसभा सदस्य चुनावका लागि सिफारिस गरेको एमाले जिल्ला अध्यक्ष राम रानाले जानकारी दिनुभयो  । पूर्वप्रधानमन्त्री खनाल अहिले इलाम क्षेत्र नं १ र नेम्वाङ २ का सांसद हुनुहुन्छ ।


पूर्वप्रधानमन्त्री खनाल ४ पटक क्षेत्र नं। १ बाट विजयी भइसक्नु भएको छ भने एकपटक पराजित बन्नु भएको थियो । पूर्वसभामुख नेम्वाङ्ग भने क्षेत्र नं। २ बाट लगातार ३ पटक विजयी भइसक्नु भएको छ ।

खनाल र नेम्वाङ दुवै राष्ट्रिय राजनीतिमा महत्वपूर्ण भूमिका निर्वाह गर्ने व्यक्ति भएकाले बैठकले सर्वसम्मत रूपमा उहाँहरूको नाम उम्मेदवारका लागि सिफारिस गर्ने निर्णय गरेको पार्टीले जनाएको छ ।