बिरगञ्ज महानगरमा फोरम नेपालका सरावगी बिजयीसँगै स्थानिय चुनाव सकियो

Posted on: September 27, 2017 | views: 164

काठमाडौं ।

यही असोज २ गते निर्वाचन सम्पन्न भएको प्रदेश नम्बर २ का ८ जिल्लाका १३६ वटै स्थानीय तहको अन्तिम मत परिणाम सार्वजनिक भएको छ ।


स्थानीय तहका प्रमुख एवं अध्यक्ष पदमा नेपाली काँग्रेसका ४०, संघीय समाजवादी फोरम २६, राष्ट्रिय जनता पार्टी नेपाल २५, नेकपा माओवादी केन्द्र २१, नेकपा एमाले १८, नेपाल लोकतान्त्रिक फोरम ३, नेपाली जनता दल २ र नयाँ शक्ति पार्टीका १ जना उम्मेदवार विजयी हुनुभएको छ ।


वीरगञ्जको मेयरमा फोरम नेपालका सरावगी विजयी

प्रदेश नम्बर दुईको एक मात्र महानगरपालिका वीरगञ्ज महानगरपालिकाको प्रमुखमा संघीय समाजवादी फोरम र उपप्रमुखमा नेपाली काँग्रेसका उम्मेदवार विजयी हुनभएको छ ।  


प्रमुखमा संघीय समाजवादी फोरम नेपालका विजय सरावगीले १९ हजार ३९३ मत ल्याई विजयी हुनुभएको हो । उहाँका निकटतम प्रतिस्पर्धी नेपाली काँग्रेसका अजय कुमार द्विवेदीले १७ हजार १९७ मत ल्याउनु भएको थियो । 


त्यस्तै उपप्रमुखमा नेपाली काँग्रेसकी शान्ति कार्कीले १९ हजार ६०७ मत प्राप्त गरि विजयी हुनुभएको छ । उहाँका निकटतम प्रतिस्पर्धी संघीय समाजवादी  फोरमकी पिंकी यादवले १८ हजार ५३० मत ल्याउनुभएको थियो । 


विजयी भएपछि सञ्चारकर्मीहरुसँग कुरा गर्दै सरावगीले महानगरको आफूले पाउने सेवा सुविधा, तलब र गाडीको समेत प्रयोग नगर्ने बताउनुभयो । 


उहाँले वीरगञ्ज महानगरपालिकामा सबैभन्दा बढी भोजपुरी भाषा बोलिने भएकाले महानगरभित्र कामकाजीको भाषा भोजपुरी नै हुने बताउनुभयो । 


यसैगरी निःशुल्क उच्च बालिका शिक्षा र आउँदो शैक्षिक शत्रदेखि महानगरभित्रका सरकारी विद्यालयहरुमा अंग्रेजी माध्यममा पढाई हुने घोषणा गर्नुभयो । उहाँले ३ मिहनाभित्र फोहर, नाला, खानेपानी, बिजुली बत्ती,  सडकको खाल्डा खुल्डी समेत मरम्मत गर्ने प्रतिवद्धता ब्यक्त गर्नुभयो । 


पर्सा जिल्लाको १४ स्थानीय तहमध्ये काँग्रेसले ३, माओवादी केन्द्रले ३ र फोरम नेपालले ४ स्थानमा जित हासिल गरेको छ । एमाले र नेपाली जनता दलले २–२ स्थानीय तहमा विजयी भएका छन् । 


कलैया उपमहानगरपालिकामा काँग्रेस विजयी


बाराको कलैया उपमहानगरपालिकाको प्रमुख पदमा नेपाली काँग्रेसका राजेश प्रसाद यादवले १०९०३ मत प्राप्त गरी विजयी हुनुभएको छ । उहाँका निकटतम प्रतिद्वन्दी नेकपा एमालेका विनोद कुमार शाहले १०७१७ मत प्राप्त गर्नुभएको छ । 


यसैगरी उपप्रमुखमा पनि नेपाली काँग्रेसकै रहिमा खातुन १०५३८ मत प्राप्त गरी विजयी हुनुभएको छ । उहाँका निकटतम प्रतिद्वन्दी नेकपा एमालेका प्रतिमा यादवले १०३७२ मत प्राप्त गर्नुभयो ।