गृहमन्त्री जनार्दन शर्मा अरुलाई कडा निर्देशन दिंदै आफैं नियम उल्लंघन गर्दै

Posted on: September 10, 2017 | views: 166

सिमरा ।

उर्जा मन्त्रीका रुपमा रहँदा कमाएको लोकप्रियतालाई उचाइदिन गृहमन्त्री बनेपछि चर्चामा आउने खालका काम गर्दै कडा निर्देशन र प्रचारमा जुटेका जनार्दन शर्मा आफैं भने निर्वाचन आयोगले जारी गरेको आचारसंहिता उलंघन गर्दै हिंड्न थालेका छन् ।


शर्माले आइतबार बिहानदेखि नेकपा माओवादी केन्द्रले बाराको विभिन्न स्थानमा आयोजना गरेको चुनावी सभामा सहभागी भएर चुनाव प्रचार गर्दै हिंडिरहेका छन् ।


शर्माले जीतपुरसिमरा उपमहानगरपालिका २३ भलुहीमा आयोजित माओवादी केन्द्रको चुनावी सभामा सम्बोधन गर्दै आफ्नो पार्टीका उम्मेदवारलाई भोट मागेका छन् ।


सरकारका गृहमन्त्रीनै चुनावी सभामा सहभागी भएर माओवादी उम्मेदवार भोट माग्दै हिँडेको देखेपछि अन्य राजनितिक दलका कार्यकर्ता र स्थानीयले असन्तुष्ट जनाएका छन् ।


सरकारी पक्षबाट बारामा आचासंहिता उलंघन भएको यो दोस्रो घटना हो । यसअघि जीतपुरसिमरा उपमहानगरपालिका ११ फत्तेपुरमा नेपाली कांग्रेसका उम्मेदवारलाई भोट माग्दै हिँडेको अवस्थामा शुक्रबार जलस्रोत राज्यमन्त्री अमरसिंह पुनलाई स्थानीयले नियन्त्रणमा लिएर प्रहरीलाई बुझाएका थिए ।


कडा सुरक्षाकाबीच कार्यक्रममा सहभागी भएका गृहमन्त्रीले मन्तव्यका क्रममा आफ्ना उम्मेदवारलाई भोट दिएर विजयी गराउन पटक पटक अपिल गरेका थिए ।


निर्वाचन आचारसंहिता अनुसार कुनैपनि मन्त्री तथा सरकारी पदमा बहाल व्यक्तिले चुनावी प्रचार तथा दलको लागि मत माग्न पाउँदैनन् ।