नेकपा एमालेको तयारी : प्रदेश नम्बर–२ को निर्वाचनका लागि केन्द्रीय नेता परिचालन

Posted on: August 10, 2017 | views: 191

काठमाडौं । नेकपा एमालेले प्रदेश नम्बर–२ का लागि हुने स्थानीय तहको निर्वाचनको तयारीका लागि पार्टीका केन्द्रीय नेताहरुलाई परिचालन गरेको छ ।

एमालेका महासचिव ईश्वर पोखरेलको अध्यक्षतामा बिहीबार पार्टी केन्द्रीय कार्यालय धुम्बाराहीमा बसेको केन्द्रीय सचिवालयको बैठकले प्रदेश नम्बर–२ का आठओटै जिल्लाको स्थानीय तहको निर्वाचनको तयारीका सन्दर्भमा भएका कामको समीक्षा गर्दै अहिलेसम्मको परिचालन उत्साहजनक भएको ठहर गरेको छ ।

पार्टीका सचिव एवं प्रचार विभाग प्रमुख योगेश भट्टराईले जारी गरेको विज्ञप्तिअनुसार ती जिल्लामा एमालेमा प्रवेशको माहोल सिर्जना भएको र भेला, बैठक, छलफल, अन्तरक्रियालगायत गतिविधि तीव्र ढंगले अगाडि बढिरहेको जनाइएको छ ।

आगामी असोज २ गते सो प्रदेशमा स्थानीय निर्वाचन हुँदैछ ।

बैठकले पार्टीका केन्द्रीय नेताहरु, सांसदहरु, अन्य प्रदेशमा जितेका स्थानीय जनप्रतिनिधि, मोर्चा संगठनका नेतालगायतलाई प्रदेश नम्बर–२ को निर्वाचनमा सहयोग गर्न ठोस जिम्मेवारीसहित खटाउने निर्णय गरेको छ ।