कोरियामा दुई नेपालीको बंगुरको पिसाब ट्यांकी सफा गर्ने क्रममा मृत्यु

Posted on: May 13, 2017 | views: 1054

सोल ।

प्रशिक्षार्थी कामदारको रुपमा दक्षिण कोरिया आएका आएका दुई नेपाली युवाको बंगुरको पिसाब जम्मा हुने ट्यांकी सफा गर्ने क्रममा निसास्सीएर निधन भएको छ ।


दक्षिण कोरियाको थेगु शहरको ख्याङ्सङेबुक्दो नजिकै बंगुर फार्ममा कार्यरत तेज बहादुर गुरुङ र छविलाल चौधरीको निधन भएको हो ।


बंगुरको पिसाब जम्मा गर्ने ट्यांकी सफा गर्ने क्रममा निसास्सिएर बेहोश भएका स्याङ्जा मासकोटका गुरुङ र कैलालीका चौधरीको उपचारका लागि अस्पताल लैजाँदै गर्दा बाटोमै मृत्यु भएको हो । 


गुरुङ तीन वर्ष र चौधरी दुई महिना अघि मात्रै रोजगार अनुमति प्रणाली 'इपिएस' मार्फत कोरिया आइपुगेको बुझिएको छ ।


प्राप्त समाचार अनुसार शुक्रबार राति ९ बजेतिर बंगुरको पिसाब जम्मा गर्ने ट्यांकी सफा गर्ने क्रममा एक्कासी बेहोस भएर ट्यांकीभित्रै बेहोश भएको अवस्थामा त्यहाँ कार्यरत अन्य नेपाली देखेपछि बाहिर निकालेका थिए ।


घटनापछि प्रहरीले बंगुर फार्मका मालिकलाई नियन्त्रणमा लिएर आवश्यक अनुसन्धान अगाडि बढाएको छ । उनीहरुको शव आङ्दोङ अस्पतालमा राखिएको छ ।


बंगुरको पिसाब संकलन गरिने ट्यांकीभित्र अक्सिजनको मात्रा कम हुने र विषाक्त ग्यास जम्मा हुने भएकाले निसास्सिएर बेहोश भएको अनुमान गरिएको छ ।