परराष्ट्रमन्त्री प्रकाशशरण महत नै खाडीमा घरेलु कामदार तस्करीमा, कारवाही गर्न निर्देशन

Posted on: April 02, 2017 | views: 781

काठमाडौं । संसदको श्रम समितिले खाडी मुलुकहरुमा घरेलु कामदारका रुपमा भइरहेको नेपाली महिलाको तस्करीमा पराराष्ट्र मन्त्रालय अर्थात् मन्त्री डा. प्रकाशशरण महतै संलग्नता देखेपछि उनलाई कारवाही गर्न सरकारलाई निर्देशन दिएको छ ।

संसदको श्रम तथा अन्तराष्ट्रिय सम्वन्ध समितिले परराष्ट्रमन्त्रीमाथि छानविन गरी कारबाही गर्न सरकारलाई निर्देशन दिएको हो । यो सँगै समितिले खाडी मुलुकमा घरेलु कामदार नपठाउन समेत निर्देशन दिएको छ । श्रम समितिले खाडी मुलुकहरुमा घरेलु कामदारका रुपमा भइरहेको नेपाली महिलाको तस्करीमा पराराष्ट्र मन्त्रालयकै भूमिका देखिएको स्पष्ट पारेको छ ।

मन्त्रालयले महिला तस्करी रोक्न दूताबासहरुले ध्यानाकर्षण गराउँदा पहल नगरेको तथा त्यसमा संलग्न एजेण्टहरुलाई कारबाही गनुको साटो पोत्साहन गरेको देखिएको बताएको छ । वैदेशिक रोजगारीमा घरेलु कामदार पठाउने निर्देशिका कार्यान्वयव गर्न दूताबासहरुले दिएको सुझाव वेवास्ता गर्नुका साथै कार्यान्वयनका लागि दबाव दिएको भन्दै समितिको निर्णयमा भनिएको छ, ‘परराष्ट्रमन्त्री लगायत निर्णय प्रक्रियामा संलग्न पदाधिकारीलाई छानबिन गरि कडा कारबारही गर्न सरकारलाई निर्देशन दिने ।’

बैठकमा उपस्थित परराष्ट्रमन्त्री डा. प्रकाशशरण महतले भने वैदेशिक रोजगारीको आवरणमा संगठित रुपमा भइरहेको मानव तस्करीलाई राज्यका निति नियमले नियन्त्रण गर्न नसकिने भन्दै बचाउ गरेका थिए । राज्यले रोक लगाएका देशमा एक जना पनि कामदार छिर्न दिने छैन भन्ने सामुहिक प्रतिवद्धता भए बैदेशिक रोजगार सम्बन्धमा बनेका नियम निर्देशिका डस्टविनमा फाले हुने भन्दै मन्त्री महत उल्टै समितिका सदस्यहरुमाथि नै खनिएका थिए ।

मन्त्री महतले मलेसिया लगायत देशमा अहिले पनि राज्यको जानकारी विना नै १७ हजार सात सय रुपैया लिएर पठाउने काम भइरहेको बताए । अन्तराष्ट्रिय सम्बन्ध तथा श्रम समितिले भने खाडी मुलुकमा घरेलु कामदार पठाउने कार्य पुर्ण रुपमा बन्द गर्न निर्देशन दिएको छ । तत्कालका लागि घरेलु कामदार सम्बन्धी ठोस कानुन नबनाउँदासम्म र नेपालसँग द्धीपक्षीय श्रम सम्झौता नगर्दा सम्म कामदार नपठाउन निर्देशन दिएको छ ।

समितिले खाडी मुलुकमा अलपत्र र समस्यामा परेका नेपाली कामदारहरुलाई तुरुन्त स्वदेश फर्काउन उच्चस्तरबाट पहल गर्न सरकार, परराष्ट्र मन्त्रालय र श्रम तथा रोजगार मन्त्रालयलाई निर्देशन समेत दिएको छ । त्यसैगरी मानव तरुकरीमा संलग्न नेपाल बाहिरका नेपाली तथा विदेशीलाई समेत कारवाहीको गर्न कूटनीतिक पहल गर्न पनि सम्बन्धीत मन्त्रालयलाई निर्देशन दिएको छ ।

समितिले सरकारले खाडी मुलुकमा नेपाली कामदार पठाउन प्रतिबन्ध लगाएको मितिदेखि हालसम्म त्रिभुवन अन्तराष्ट्रिय विमानस्थल अध्यागमन कार्यालय प्रमुख रहेकाहरुलाई निलम्बन गरी कानुनी कारवाही गर्न पनि गृह मन्त्रालयलाई निर्देशन दिएको छ ।