साउदी अरब छाड्न अबैधानिक कामदारलाई ९० दिने आममाफी घोषणा

Posted on: March 20, 2017 | views: 259

एजेन्सी ।
अवैध रुपमा बस्दै आएका विदेशी कामदारलाई कम गर्न साउदी अरब सरकारले उनिहरुलाई लक्षित गर्दै ९० दिने आममाफीको घोषणा गरेको छ ।

चैत १६ गतेदेखि लागू हुने गरि जारि गरिएको आम माफी घोषणाको ९० दिनमा दशौं लाख यस्ता अवैध कामदारले देश छाड्ने साउदी सरकारले अपेक्षा गरेको छ ।

साउदीका राजकुमार एवं उपप्रधान तथा गृहमन्त्री मोहम्मद विन नइफले ‘अ नेशन विथआउट भ्वाइलेन्स’ नामक अभियान थाल्नै आममाफीको घोषणा गरेका हुन् ।

यो अवधिमा श्रम ऐन उल्लंघन गर्दै साउदी अरबमा बसेका विदेशी कामदारले विना सजाय देश छाड्न पाउनेछन् ।

नइफले नियम उल्लंघन गरेकाहरुलाई यो व्यवस्थाको लाभ लिन र आफ्नो छवी सुधारका लागि प्रयोग गर्न आग्रह समेत गरेका छन् ।

अवैध रुपमा बसेकालाई साउदी छोड्ने काममा सहयोग गर्न निर्देशन दिंदै उनले यसबाट अबैध कामदारहरु बिना सजाय आफ्नो देश फर्कन सक्ने बताएका छन् ।

मन्त्रालयका प्रवक्ता मनसुर अल टुर्कीका अनुसार यो अभियान १९ वटा सरकारी निकायहरुले सञ्चालनमा ल्याउने छन् ।

हाल जारी सुविधा हज वा उम्राहको दर्शनको लागि आएर भिषा अवधि समाप्त भएपनि घर फिर्ता नभएका र भिसासँग सम्बन्धि अन्य विषयमा समेत लागु हुने बताइएको छ ।

प्रवक्ता टुर्कीले आप्रवासी कामदार तथा कामको अनुमति नपाएका सीमा क्षेत्रमा सुराकीको लागि आएकाहरुको सम्बन्धमा यस्ता व्यक्तिलाई ट्राभल परमिट जारी गरिने बताएका छन् ।

परिचय पत्र नभएका आप्रवासी कामदार र धार्मिक भ्रमणमा आएर लामो अवधि बसेकाहरुले यो सुविधा लिन पासपोर्ट विभाग जानु नपर्ने बताइएको छ ।

साउदी अरब सरकारले आफ्ना देशवासीलाई वर्क पर्मिट र आवसीय नियम उल्लघंन गरेकाहरुलाई काममा नलगाउन समेत आग्रह गरेको छ ।

३ वर्ष पहिले यस्तै कार्यक्रम सञ्चालनमा ल्याउँदा करिब २५ लाख मानिसले साउदी छोडेका थिए । यसपटक जारी आममाफीपछि पनि नफर्कने अवैध कामदारमाथि कारवाही थालिने चेतावनी साउदी सरकारले दिएको छ ।