कोरियाले १० हजार नेपाली लैजाने, फारम भर्न नयाँ व्यवस्था

Posted on: February 28, 2017 | views: 507

काठमाडौं ।
नेपालीका लागि वैदेशिक रोजगारीको आकर्षक गन्तव्य बन्दै आएको दक्षिण कोरियाले आगामी वर्षका लागि नेपाली कामदार संख्याको कोटा वृद्धि गर्दै १० हजार नेपाली कामदार लैजाने भएको छ ।

 इपीएस अन्तर्गत कोरियाको मानव संशाधन विभाग 'एचआरडी' ले १० हजार २ सय कामदारको कोटा छुट्याइएको छ । जसमध्ये ६ हजार २ सय कृषिमा र ४ हजार कामदार उत्पादनमूलक क्षेत्रका लागि कोटा छुट्याइएको छ ।

यो वर्ष ३५ सय कामदार मात्रै इपीएसमा पास भएका थिए । यो वर्षका लागि इपीएसले ३१ सय कामदारको कोटा छुट्याएको थियो ।

अब इपीएसको फारम भर्न लाइन समेत बस्न नपर्ने भएको छ । रोजगार अनुमति प्रणाली 'इपीएस' अन्तरगत सन् २०१८ को कोरियन भाषा परीक्षाको फारम चैत ९ गतेदेखि खुला हुनेछ भने यो पटकदेखि अनलाइन मार्फत लाइन नबसी नै फारम  भर्न सकिने भएको छ ।

चैत ९ देखि १८ गतेसम्म इपीएस परीक्षाको अनलाइन आवेदन फारम बुझ्न लागिएको छ ।

 वैदेशिक रोजगार विभाग अन्तरगतको इपीएस कोरिया शाखाले यस्तो फारम भर्ने अनलाइन प्रणाली विकास गरिसकेको जनाएको छ । इपीएस परीक्षा भने जेठको अन्तिम सातामा हुने बताइएको छ ।

अनलाइनमा फारम भर्न तोकिएका बैंकमा तोकिए बमोजिम  आवेदन शुल्क बुझाउनु पर्नेछ । बैंकबाट रकम जम्मा गरेको कोड राखेपछि मात्रै अनलाइन फारम ‘सब्मिट’ गरेर  अन्य डिटेल भर्न सकिनेछ ।  फारमका लागि मेसिन रिडेबल पासपोर्ट 'एमआरपी' अनिवार्य गरिएको छ ।