लक्की रहिछिन् लक्की । पुन अष्ट्रेलियाको लागि राजदूतमा सिफारिस

Posted on: February 21, 2017 | views: 606

मुकुन्दराज भेटुवाल-सिड्नी ।
अष्ट्रेलियाको लागि नेपाली राजदूतमा पुन लक्की शेर्पा सिफारिस भएकी छिन् ।

केपी ओली नेतृत्वको सरकारले अघिल्लो पटक अष्ट्रेलियाको लागि नेपाली राजदूतमा सिफारिस गरेपनि लक्की शेर्पा सहित सबैको नाम रद्द गरेको दाहाल सरकारले पुन लक्कीलाई भने अष्ट्रेलियाको लागि राजदूतमा सिफारिस गरेको छ ।

मन्त्रिपरिषदको सोमबारको बैठकले एमालेको पूर्व सभासदसमेत रहेकी शेर्पालाई राजदूतमा सिफारिस गरेको हो ।

पहिलो संविधानसभामा एमालेबाट सभासद रहेपनि दोस्रो संविधानसभा चुनाव समयबाट पुष्पकमल दाहाल नेतृत्वको माओवादीमा प्रवेस गरेकी शेर्पा दाहाल निकट मानिन्छिन् ।

अध्ययन र कार्य क्षमताको आधारमा समेत सरकारले सिफारिस गरेका राजदूतहरुको नाममा शेर्पा सक्षम रहेको बताइन्छ ।

मन्त्री परिषद बैठकबाट माओवादीले आफ्नो कोटामा युवना लम्साललाई डेनमार्क, लक्की शेर्पालाई अष्ट्रेलिया, महेन्द्रबहादुर सिंहलाई साउदी अरब र पदम सुन्दासलाई बहराइनका लागि राजदूत सिफारिस गरेको छ ।

यसैगरि शर्मिला पराजुली ओमानका लागि राजदूत सिफारिस भएकी छिन् । उनी फोरम लोकतान्त्रिक बिजय कुमार गच्छेद्दारको कोटाबाट परेकी हुन् ।

म्यानपावर व्यवासाय गर्दै ओमानमै नेपाली कामदार पठाउँदै आएकी पराजुली राजदूत भएपछि उनले मान्छे पठाउने काम गर्ने कि राजदूतको भन्नेमा विवाद र बहस सुरु भएको छ । सँगै पैसा तिरेर नेता खुशी पारेरै उनी राजदूतमा पर्न सफल भएको बताइएको छ ।

कांग्रेसबाट अर्जुनजंगबहादुर सिंह दक्षिण कोरिया, भीम उदास म्यानमार, चोपलाल भुसाल बंगलादेश, विश्वम्भर प्याकुरेल श्रीलंका, रमेशप्रसाद कोइराला कतार र आशा लामा यूएईका लागि राजदूत सिफारिस भएका छन् ।

राप्रपाले तीन राजदूत पाएको छ । प्रतिभा राणा जापान, भरत रायमाझी स्पेन र निरन्जन थापा इजरायलका लागि राजदूत सिफारिस भएका हुन् ।

राणा काँग्रेस सभापती रहेका शेरबहादुर देउवाका आफ्नै सासु समेत हुन् । उनलाई काँग्रेसको समेत समर्थन र आग्रहमा राप्रपाले जापानको लागि राजदूत सिफारिस गरेको बताइएको छ ।