अमेरिकामा अबैध बसेकाहरु फर्काउन व्यापक छापा

Posted on: February 11, 2017 | views: 1800

एजेन्सी ।
अबैध रुपमा अमेरिकामा बसेकालाई उनिहरुको देश फर्काउन राष्ट्रपति डोनाल्ड ट्रम्पको आदेश कार्यान्वयन गर्दै यहाँको प्रहरीले विभिन्न राज्यमा व्यापक छापा मार्न थालेको छ ।

गत जनवरी २६ को कार्यकारी आदेश कार्यान्वयन स्वरुप अमेरिकामा सरकारका संघीय एजेण्टहरुले कागजपत्रबिहिनहरुलाई पक्राउ गर्नका लागि छापामार्न सुरु गरेको हो ।

बिहिबार र शुक्रबार इमिग्रेशन एण्ड कस्टम इन्फोर्समेन्ट आइसका अधिकारीहरुले कम्तीमा ६ वटा राज्यमा छापा मारेर कैयन कागजपत्रबिहिन आप्रवासीहरुलाई पक्राउ गरेको वासिंटन पोष्टले सरकारी अधिकारीहरुलाई उदृत गर्दै समाचार लेखेको छ ।

पक्राउ पर्नेहरुमध्ये अधिकांश पुरुषहरु रहेको र उनिहरु अमेरिकामा रहन पाउने आवश्यक कागजात नभएकाहरु भएको बताइन्छ ।
इमिग्रेशन एण्ड कस्टम इन्फोर्समेन्टले छापामार्न थालेपछि कागजपत्र हुनेहरुलाई साथमा नागरिक भएको प्रमाण, ग्रिनकार्डको फोटोकपी वा आईडी राख्न तथा कागजपत्र नहुनेहरुलाई सावधानी अपनाउन कानुनविदहरुले सुझाव दिएका छन् ।

कुनै अपराधमा संलग्न नरहेका कागजपत्रबिहिन आप्रवासीहरुलाई पनि निशाना बनाइएको जनाइएको छ ।

ट्राफिक स्टपहरु र चेकप्वाइन्टमा समेत इमिग्रेशन एण्ड कस्टम इन्फोर्समेन्ट आइसका अधिकारीहरुले गतिविधि तीब्र पारेको बताइन्छ ।

राष्ट्रपति ट्रम्पले अमेरिकाबाट अपराधमा संलग्न ३० लाख कागजपत्रबिहिन आप्रवासीहरुलाई देशनिकाला गर्ने प्रतिबद्धता जनाएअनुरुप इमिग्रेशन एण्ड कस्टम इन्फोर्समेन्टले गतिविधि तीब्र पारेको हो ।

डिपार्टमेन्ट अफ होमल्याण्ड सेक्युरिटीका प्रवक्ताले एटलान्टा, लस एन्जलस र अरु दुईवटा शहरमा काम गर्ने स्थान र घरहरुमा इमिग्रेशन एण्ड कस्टम इन्फोर्समेन्टले कागजपत्रबिहिनमाथि छापा मारेको पुष्टी गरेका छन्

बिहिबार र शुक्रबार इमिग्रेशन एण्ड कस्टम इन्फोर्समेन्टका अधिकारीहरुले क्यालिफोर्नियाको भिस्टा, पोमोना र कम्पटन, टेक्सासको अष्टिन, डलास र फ्लुजरभिल, भर्जिनियाको अलेक्जान्द्रिया, अन्नानडेल, नर्थ क्यारोलिनाको चार्लोट, बर्लिंगटन, फ्लोरिडाको प्लान्ट सिटी, न्युयोर्कको हड्सन भ्याली, कन्सासको विचिटा लगायतका क्षेत्रमा छापामारेका छन् । नर्थ क्यारोलिना र अष्टिनमा चेकप्वाइन्टमा आकस्मिक जाँच गरेर आईडी मागेको पनि जनाइएको छ ।

आप्रवासीका लागि सुरक्षित शहर भनेर चिनिने स्यांचुअरीसिटीमा ती सिटीहरुका नीतिलाई चुनौतीदिनका लागि इमिग्रेशन एण्ड कस्टम इन्फोर्समेन्टले छापा मार्न थालेको जनाइएको छ ।