अष्ट्रेलियामा नेपाली आमा छोरीको शंकास्पद निधन

Posted on: January 30, 2017 | views: 1298

मुकुन्दराज भेटुवाल-मेलबर्न ।
अष्ट्रेलियाको मेलवर्नमा रहेको पास्कोभेल क्षेत्रमा एक नेपाली महिला र उनकी ३ वर्षीया छोरी मृत अवस्थामा फेला परेका छन् ।

प्रहरीले शंकास्पद अवस्थामा मृत फेला परेको भनिएकी महिला ३९ बर्षकी रहेको बताएपनि परिचय खुलाएको छैन । घटनाका सम्वन्धमा प्रहरीले अनुसन्धान अघि बढाएको जानकारी दिएको छ ।

मेलवर्नको पास्के भेलस्थित अस्कानासी एभिन्यूमा आफ्नो श्रीमान र छोरीसँगै बस्दै आएको उनको परिवार विगत ५ बर्षदेखी यहाँ बस्दै आएको बुझिएको छ ।

प्रहरीले जनाए अनुसार मृत्यु भएकी महिलाको घर नजिकको एक छिमेकीले आइतबार एक पुरुष अत्तालिदै बाहिर दौडिरहेको आफूले देखेको बताएका छन् । उनी मृतक महिलाका श्रीमान हुनसक्ने अनुमान गरिएपनि पुष्टि भएको छैन ।

मोहम्मद असद नाम गरेका ति छिमेकीले ले हेराल्ड सनसित भने, ‘उनी चुपचाप आएर घरभित्र पसे अनि एकछिनपछि चिच्याउँदै बाहिर निस्के ।’ उनले मृतक महिला नेपाली भएको भन्दै उनका श्रीमान् भने भारतीय मुलका भएको आफुले यसअघिका कुराकानीबाट थाहा पाएको बताएका छन् ।

भिक्टोरियाका प्रहरी आयुक्त ग्राहम आस्टोनले यस घटनामा बाहिरी व्यक्ति जोडिएको अहिलेसम्म नपाइएको बताएका छन् ।

निधनमा कसैको संलग्नताबारे यसै भन्न नसकिने बताएको प्रहरीले उनिहरुबिच यसअघि झै झगडा भएको नजिकका छिमेकीहरुले कहिल्यै नदेखेको बताएको जानकारी दिएको छ ।
लामो समयदेखी उक्त क्षेत्रमा बस्दै आएका मृतक नेपाली महिलाका भारतीय मुलका श्रीमान्सँग सामान्य सोधपुछ गरिएको र महिलाले आफुले बालिकाको हत्यापछि आफुले आफ्नो हत्या गरेको प्रहरीको आशंका छ ।

पारिवारिक खटपटका कारण यस्तो अवस्था आएको प्रहरीको आशंका रहेपनि अुनसन्धान जारी रहेकाले तत्काल केही भन्न सकिने अवस्था नरहेको प्रहरीले बताएको छ ।