खोटाङबासीलाई बेलायतबाट एम्बूलेन्स उपहार

Posted on: November 05, 2016 | views: 327

२० कार्तिक, खोटाङ ।
खोटाङ सेवा समाज यूकेले खोटाङलाई सात वटा एम्बूलेन्स उपलव्ध गराउने भएको छ । सन् २००७ मा बेलायतमा स्थापना गरिएको समाजले दुई प्राथमिक स्वास्थ्य केन्द्र र पाँच स्वास्थ्यचौकीमार्फत सञ्चालन हुनेगरी एम्बूलेन्स उपलव्ध गराउने जनाएको छ ।

खोटाङ सेवा समाज यूके एम्बूलेन्स समन्वय समितिका काठ्माण्डौं संयोजक जयकुमार राईले शुक्रबार स्थानीय शान्ति समितिको कार्यालयमा आयोजित सर्बदलीय बैठकमा सात एम्बूलेन्स दिने तयारी भइरहेको जानकारी दिनुभयो ।

जिल्लाका बिरामीलाई तत्काल अस्पतालसम्म पु¥याउने र उनीहरुको ज्यान बचाउका लागि एम्बूलेन्सको व्यवस्था मिलाउने तयारी गरिएको हो । चिसापानी, डाँडागाउँ र बाक्सिलाकालागि गत वर्ष नै एम्बूलेन्स खरिद गरेको समाजले यसपल्ट थप सिमपानी, निर्मलीडाँडा, बुईपा र ऐसेलुखर्ककालागि एम्बूलेन्स खरिद गर्न रकम संकलन भइरहेको जानकारी दिइएको छ । निस्वार्थ र सामाजिक सेवाभावले स्थापना गरिएको समाजले एम्बूलेन्स जुटाउनका लागि यूकेमा रत्नकुमार राईको संयोजकत्वमा एम्बूलेन्स समन्वय समिति गठन गरिएको थियो ।

समाजले जिल्ला अस्पताललाई एक थान अल्ट्रासाउण्ड समेत उपलव्ध गराउन लागेको राईले जानकारी दिनुभयो । बैठकमा एम्बूलेन्स सञ्चालनकालागि सडक तथा मर्मत गर्ने, अल्ट्रासाउण्डको नियमित अनुगमन गर्ने, जिल्लाको हरेक सार्वजनिक महत्वको बिषयमा सम्बन्धीत कार्यालयका प्रतिनिधिलाई बोलाएर छलफल गर्ने निर्णय गरेको छ । सात एम्बूलेन्स तथा अल्ट्रासाउण्ड उपलव्ध गराउन लागेकामा खोटाङ सेवा समाज यूकेप्रति जिल्लाका राजनैतिक दलका नेताहरुले कृतज्ञता ज्ञापन गरेका छन ।

यस्तै, यूकेमा एम्बूलेन्स अभियान चलिरहँदा खोटाङ सेवा समाज दोहा कतारले पनि खोटाङका लागि एम्बूलेन्स जुटाउन आर्थिक संकलन गरिरहेको छ । रोजगारीका सिलसिलामा कतारमा पुगेका जिल्लाबासीले सुविधा सम्पन्न अस्पताल पुग्न नपाउँदै ज्यान गुमाइरहेका सर्वसाधारणको हितलाई मध्यनजर गर्दै आफ्नो गाँस काटेर रकम संकलन गरिरहेका छन् ।

वैदेशिक रोजगारीका लागि कतार पुगेका खोटाङ्गेको पहलमा २०५४ सालमा स्थापना गरिएको समाजले एम्बुलेन्स जुटाउनका लागि नयाँ वर्षको अवशर पारेर कतारमा गत चैत्रमा बनभोजको आयोजना गरेको थियो । हाल कतारमा एम्बूलेन्स खरिदका लागि रकम उठ्नेक्रम जारी रहेको खोटाङ सेवा समाज दोहा कतारका महासचिव रुद्रप्रसाद शर्मा बताउनुभयो ।