मलेसियाद्धारा आतंकवादी आरोपमा एक नेपालीलाई देश निकाला

Posted on: September 23, 2016 | views: 461

७ असोज, मलेसिया ।
आतंकवादी क्रियाकलापमा संलग्न भएको आशंकाकै भरमा मलेसियाले एक नेपाली युवालाई देश निकाला गरेको छ ।

समाचार अनुसार मलेसियाको बुकित बिन्ताङमा होटल र मनोरञ्जन व्यवसाय सञ्चालन गर्दै आएका एक नेपालीसहित एक बंगलादेशी र एक मोरक्कोका नागरिकलाई पनि मलेसिया सरकारले देश निकाला गरि उनिहरुकै देश पठाएको छ ।

मलेसियाको स्ट्रेट्स टाइम्स दैनिकमा प्रकाशित समाचार अनुसार एक मलेसियाली नागरिक पनि पक्राउ गरेका छन् तर उनलाई हिरासतमा राखेर अनुसन्धान गरिरहेको बताइएको छ । पक्राउ पछि आरोप प्रमाणित नभएपनि अन्य देशका नागरिकलाई भने देश निकाला गरि पठाइएको छ ।

गत महिना मलेसियाको स्वतन्त्रता दिवसका क्रममा आईएस लडाकू पक्राउ गरे लगतै मलेसियाको सुरक्षा निकायले गरेको अपरेशनपछि यो समाचार बाहिर आएको हो ।

पक्राउ परेर नेपाल फर्काइएका नेपाली नागरिकको उमेर ३८ बर्ष रहेको बताइएको छ । विस्तृत विवरण नखुलाइएपनि उनले अन्तराष्ट्रिय आतंकवादीहरुका लागि नक्कली कागजपत्र बनाइदिने काममा सहयोग गर्दै आएका थिए ।

तर यसरी नक्कली कागजात बनाउने काममा के कस्तो सहयोग गरेको र त्यो जानाजान वा अन्जानमा भन्नेपनि समाचारमा केही खुलाइएको छैन ।