स्वदेशमै स्वरोजगार ! बिदेश जाने नेपाली घट्दै

Posted on: September 20, 2016 | views: 419

४ असोज, काठमाडौं ।
नेतृत्व वर्गको असक्षमताले राजनीतिक अन्योलता र अस्थिरता रहेपनि देशभित्रै अवशरको खोजि र स्वरोजगारी अपनाउँदै बिदेश कामको लागि जाने नेपाली युवाहरुको संख्या घट्न थालेको छ ।

वैदेशिक रोजगारीमा जाने नेपालीको संख्या चालु आर्थिक वर्ष २०७३र७४ को पहिलो दुई महिना घटेको पाइएको छ ।

वैधानिक रुपले अन्तिम श्रम स्वीकृति लिएर ६४ हजार नेपाली दुई महिनामा बिदेश गएपनि यो अघिल्लो महिनाको तुलनामा न्युन रहेको पाइएको छ ।

गतवर्ष साउन भदौमा म्यानपावरले कामदार विदेश पठाउन छाडेर फ्री भिसा विरुद्ध उत्रिँदा पनि विदेश जानेको संख्या यो वर्षको सोही भन्दा बढी देखिन आएको पाइन्छ ।

गत वर्षको साउन तथा भदौमा ७४ हजार नेपाली विदेशिएको सरकारी तथ्यांक छ । यसवर्ष झण्डै दुईमहिनाको तुलना गर्दा १० हजार कम नेपाली युवा बिदेशीएका छन् ।

मलेसियामा जाने कामदारको संख्यामा लगातार गिरावट आएको छ भने दुबई, कतार, साउदीसहित खाडी राष्ट्रमा आर्थिक संकट बढ्नाले पनि विदेशिने नेपालीको संख्यामा गिरावट आएको ठानिएको छ ।

वैदेशिक रोजगार विभागका अनुसार साउन र भदौ महिनामा मात्रै ६४ हजार ७ सय ६४ जनाले श्रम स्वीकृति लिई विदेश गएका छन् ।

साउन महिनामा ३१ हजार ९ सय ८५ जना विदेशिएका छन् । गतवर्ष साउनमा ३७ हजार ७ सय ५६ जना विदेशिएका थिए ।

भदौ महिनामा ३२ हजार ७ सय ७९ जना विदेश श्रम स्वीकृत लिई विदेश पलायन भएका छन् । गतवर्ष भदौमा ४० हजार २ सय ७५ जनाले विदेशमा काम गर्न जान स्वीकृति पाएका थिए ।

भदौ र साउनमा ६१ हजार पुरुष र २९ सय ३२ जना महिला कामदार विदेशिएका छन् । नेपालबाट वैधानिक श्रम स्वीकृति लिएर १ सय १० भन्दा बढी मुलुकमा कामदार रोजगारीका लागि जान पाउँछन् ।