अष्ट्रेलियामा आफु बिरुद्ध उजुरी परेको थाहा पाएपछि प्रचण्ड आएनन्

Posted on: June 23, 2016 | views: 966

मुकुन्दराज भेटुवाल-९ असार, अष्ट्रेलिया ।
उड्न केही घण्टा मात्र बाँकी रहँदा अचानक अष्ट्रेलिया भ्रमण रद्द गरेका नेकपा माओवादी केन्द्रका अध्यक्ष पुष्पकमल दाहाल प्रचण्ड बारेको खास रहस्य खुल्न आएको छ ।

आन्तरिक राजनीतिका कारण तथा प्रचण्डका स्वकिय सचिवले कार्य व्यस्तता तथा व्यक्तिगत कारण उनको भ्रमण स्थगित भएको बताइरहँदा अष्ट्रेलियामा प्रचण्ड विरुद्ध उजुरी परेको थाहा पाएपछि उनि अष्ट्रेलिया नगएको सार्वजनिक भएको हो ।

यहाँ सञ्चालनमा रहेको नेपाली टेलिभिजन माइ नेपाल टिभिका अनुसार १० वर्षे हिंसात्मक विद्रोहमा १५ हजार नेपाली मारिनुमा प्रचण्ड जिम्मेवार रहेको भन्दै उजुरी परेको छ ।

प्रचण्ड अष्ट्रेलिया आउँदा हिंसालाई बढावा दिएको ठानिने भन्दै भ्रमण रोक्न माग गर्दै न्यू साउथ वेल्स प्रिमियरसमक्ष नेपाली मूलका एक अष्ट्रेलियन नागरिकले उजुरी दिएका छन् ।

उजुरीमा नेपाली मूलका अष्ट्रेलियन नागरिकले न्यू साउथ वेल्स प्रिमियर माइक बेयर्ड समक्ष प्रचण्डकै नेतृत्वमा नेपालमा सशस्त्र संघर्ष भएको, उनका कारण १५ हजार नेपालीको ज्यान गएको, दाहाल विरुद्ध नेपालमा अहिले पनि ३७ वटा उजुरी विचाराधिन रहेको, डेढलाख भन्दा बढी परिवार विस्थापित हुनुपरेको भन्दै उनको भ्रमण रोक्न माग गरेका थिए ।

उजुरीमा प्रचण्ड नेतृत्वको तत्कालिन नेकपा माओवादीलाई अमेरिकाले आतंककारीको सूचीमा राखेको समेत उल्लेख छ ।

उजुरी लगत्रै न्यू साउथ वेल्स प्रिमियरको कार्यालयले उजुरीलाई प्राथमिकतामा राखेर कारवाही प्रक्रिया अघि बढाउन निर्देशन दिएको थाहा पाएपछि प्रचण्ड अष्ट्रेलिया भ्रमणमा आउन हच्किएका हुन् ।

सो उजुरीको विषयमा डेपुटी प्रिमियर एवम् मन्त्री 'न्याय र प्रहरी' ट्रोय ग्रान्टलाई पनि खबर गरिएको थियो । प्रवेशाज्ञाको विषय केन्द्रीय सरकारको मातहत पर्ने भएकाले केन्द्रीय सरकारलाई पनि पत्राचार गरिसकेको बताइएको छ ।

उक्त उजुरी र प्रचण्डको भ्रमणका विषयमा नेपालबाट पनि पत्राचार भएको र नेपाललाई न्यू साउथ वेल्सको अफिसबाट जवाफ आएको एक पत्र पनि सार्वजनिक भएको छ । तर सो पत्र पाउने व्यक्तिको नाम र ठेगाना भने सार्वजनिक गरिएको छैन ।

नेपालमा गठित सत्य निरुपण तथा मेलमिलाप आयोगले मुद्दाको किनारा नलगाएकाले पार्टीका नेताहरुले नै प्रचण्डलाई जे पनि हुन सक्ने भन्दै भ्रमण स्थगित गर्न सुझाव दिएका थिए ।

सुझाव तथा अष्ट्रेलियामा रहेका माओवादी समर्थकहरुसँग समेत भएको टेलिफोन सम्वादका आधारमा प्रचण्ड उड्नु ४ घण्टा अघि मात्र भ्रमण रद्द गर्न सहमत भएका थिए ।