नुवाकोटका हरिबहादुर घलेलाई फेरी थप कैद सजाँय सुनाइयो,फर्काउनको लागी पहल गर्न परिवारको आग्रह

Posted on: November 11, 2018 | views: 287

रामहरि न्यौपाने,
नुवाकोट । मलेसियाको जेलमा रहेका नुवाकोटको म्यागङ्ग गाँउपालिका–१ बसुञ्चेतका हरिबहादुर घलेलाई छुटाउनको लागी पहल गर्न नेपाल सरकार समक्ष परिवारले आग्रह गरेका छन् ।


हाल त्यहाँको जेलमा रहेका ३८ वर्षीय घलेलाई गत कात्तिक ४ (सन् २०१८ अक्टुबर २१) मा पुनः १३ वर्ष आठ महिना कैद सजाँय थपिएपछि त्यसलाई मिनाहाको लागी पहल गर्न परिवारले सरकार समक्ष सहयोगको अपिल गरेका हुन् ।
मलेसियामा लागूऔषध कारोबारी कसुरमा १५ वर्षअघि पक्राउ परेका ३८ वर्षीय घलेलाई त्यहाँको अदालतले दोषी ठहराएपछि उनी हाल जेल जीवन बिताउदै आएका छन् ।


विसं २०६० जेठ १६ (सन् २००३ मे ३०) मा कार्यरत कम्पनीबाट बिदामा घर फर्कने क्रममा बाँस बसेको होटलबाट पक्राउ परेका घलेलाई लागूऔषध ओसारपसार अभियोगमा सुरुमा मृत्यु दण्ड सुनाएपनि हाल २० वर्षको कैद भुक्तानी गर्दै आएको उनको बहिनी सरला घलेले बताइन् ।

उनको अनुसार हरिबहादुरलाई सन् २००९ नोबेम्बर २६ मा मलेसियाको हाइकोर्ट (जालन उच्च न्यायालय) ले मृत्यु दण्डको सजाँय सुनाएको थियो । त्यसविरुद्ध नेपाली दूतावासले गरेको अपिललाई त्यहाँको सर्वोच्च अदालतले विसं २०६९ असोज १० मा मृत्यु दण्डको सजाँयलाई नै सदर गरिदिएको थियो ।

“सर्वोच्चले ३५ दिनभित्र मृत्यु दण्ड दिन आदेश दिएपनि नेपाल सरकारको आग्रहले त्यहाँको राजाले २० वर्ष कैद सजाँयमा रुपान्तरण गरेर न्यायको अनुभूति मिलेको थियो ।” सरलाले भनिन् “अबदेखि लागू हुनेगरी थप १३ वर्ष आठ महिना जेल सजाँय तोकिएकाले त्यसलाई मिनाहाको लागी पहल गर्न नेपाल सरकार समक्ष आग्रह गर्दछौ ।”


हरिबहादुरलाई यसअघि मृत्यु दण्डको सजाँय रोकेका त्यहाँका राजा प्रमुख रहेको पार्डन बोर्डको आदेशको पुनरावेदनको क्रममा थप कैदको आदेश सुनाइएको हो । उक्त थप आदेश सरकारको पहल सार्थक भएमा मिनाहा हुने उनको विश्वास छ । पार्डन बोर्डलाई अदालतको आदेश कार्यान्वय गराउने अन्तिम न्यायिक निकाय मानिन्छ ।


यसअघि उक्त बोर्डले तोकेको २० वर्ष कैद पक्राउ परेको मितिबाट भुक्तानी गर्न करीब चार वर्ष मात्र बाँकी छ । तर, हाल थप गरेको सजाँयको कैदको माफीको लागी नेपाल सरकारबाट पहल भए त्यो सुविधा पाउने व्यबस्था रहेको भन्दै पीडित परिवारले सहयोगको अपिल गरेका छन् ।


हरिबहादुरसँगै पक्राउ परेका नुवाकोट किम्ताङका साजन गुरुङको हिरासतमा रहदाँ विसं २०६६ माघ ६ (सन् २०१० जनावरी २०) मा मृत्यु भइसकेको छ । उनीहरुलाई नेपाल घर बताउने गणेश तामाङ भन्ने व्यक्तिले होटलमा आएर झोला राख्न दिएलगत्तै प्रहरीले छापा मार्ने क्रममा पक्राउ परेका थिए । गणेश हालसम्म फरार छन् ।


हरिबहादुर मलेसियाको जेलमा परेपछि पीडित बनेको परिवारका सदस्यहरु बुबा मेघबहादुर, आमा जमुरानी, बहिनी मिनकुमारी, हजुरबुबा धनबहादुर घलेको पनि यो अवधिमा मृत्यु भइसकोे छ । एकपछि अर्को बज्रपातले परिवारमा शोकमा रहेको सरलाले बताइन् ।


हरिबहादुर जेल परेपछि उनको श्रीमतिले पनि छोरी झरनालाई छोडेर अर्कैसंग बिबाह गरिसकेकी छिन् । हाल झरना त्रिशूली स्थित मामाघरमा बसेर स्नातकतहमा अध्ययनरत छिन् ।
“बुबाको अनुहार कस्तो थियो, प्रत्यक्ष देख्न पाएकी छैन ।” झरनाले भनिन् “फोटो हेरेर बुबा फर्कने दिन पर्खदै छु, सरकारले पहल गरे चाडै देख्न पाउने आशा छ ।” रासस ।


 नुवाकोटको म्यागङ्ग गाँउपालिका–१ बसुञ्चेतका हरिबहादुर घलेलाई छुटाउन गरिएको पहल सम्बन्धि कागजात निम्न बमोजिम रहेको छ ।