कुर्दिस्तानका नेपालीहरु यसरी मनाउँदै दशैं तिहार, टिकाकै दिन विशेष कार्यक्रम

Posted on: October 09, 2018 | views: 1679

कुर्दिस्तान ।

कुर्दिस्तानमा रहेका नेपालीहरुले सामुहिक रुपमा जमघट गरेर सांगितिक कार्यक्रम, नेपाली परिकार सहित यसपटक नेपालीहरुको सबैभन्दा ठूलो चाड दशैं र तिहार मनाउने भएका छन् ।

यहाँको सबैभन्दा बृहत संस्था प्रवासी नेपाली एकता समाज कुर्दिस्तानको आयोजनामा विगतका बर्षहरुमा जस्तै यसबर्षपनि नेपाली कलाकारहरु सहित ईराक तथा कुर्दिस्तानमा रहेर नेपाली सांगितिक क्षेत्रमा सक्रिय गायक गायिका लगायत कलाकारहरुको प्रस्तुती सहित दशैं तिहार विशेष कार्यक्रम गर्न लागिएको समाजका अध्यक्ष नबिन कुमार लामाले टपनेपालन्युजडटकमलाई जानकारी दिनुभयो ।

आयोजक संस्थाले अक्टोबर १९ तारिक अर्थात बडा दशैंको टिकाकै दिन पारेर परदेशमा रहेका नेपालीहरुको दशैंलाई रमाईलो बनाउने उदेश्य सहित नेपाली खाना, सांगितिक प्रस्तुती सहित चिट्ठा कार्यक्रम समेत आयोजना गरेको छ ।

कुर्दिस्तानको होली नवरज हलमा हुने कार्यक्रम बिहान १० बजेबाट सुरुभई साँझ ७ बजेसम्म जारी रहने बताईएको छ ।

सिटि एक्सप्रेस र मकवानपुर समृद्धि शिखर समाज कार्यक्रमको सह प्रायोजक रहेका छन् । कार्यक्रममा हुने दशैं तिहार विशेष कार्यक्रमको चिट्ठामा प्रथम उपहार स्कुटर राखिएको छ भने ल्यापटप, मोबाइल, साईकल सहित १० वटा घडी सान्त्वना उपहार राखिएको छ ।

कार्यक्रम स्थलसम्म पुग्न सहभागीहरुको लागि स्थानिय समी अब्दुलरहमान पार्कमा निशुल्क यातायातको ब्यवस्था गरिएको आयोजकले जानकारी दिएको छ । कुर्दिस्तानमा रहेका सबै संघसंस्थालाई उपस्थितिको लागि निमन्त्रणा गरिनुका साथै सबै नेपालीहरुको उपस्थिति रहने विश्वास सहित कार्यक्रम आयोजक समाजका अध्यक्ष लामाले दशैं तिहार शुभकामना आदान प्रदान सहित रमाईलो गर्न लागिएको कार्यक्रममा सबैको साथ र सहयोग पाउने विश्वास समेत व्यक्त गरे ।

वि.सं. २०७२ सालमा स्थापित प्रवासी नेपाली एकता कुर्दिस्तानले ईराक तथा कुर्दिस्तानमा समस्यामा परेका नेपालीहरुलाई सहयोग सहित यहाँका नेपालीबिचको एकता र भातृत्वको लागि काम गर्दै आएको छ ।

नेपालमा विभिन्न सामाजिक कार्यहरुमा समेत सहयोग गर्दै आएको समाज कुर्दिस्तान क्षेत्रमा रहेका नेपालीहरुबिच सक्रिय संस्थाको रुपमा परिचित छ ।