अफगानिस्तानबाट पाकिस्तान पुगेर अलपत्र नेपाली फर्काइदै

Posted on: May 01, 2016 | views: 350

२४ चैत, काठमाडौं ।
अफगानिस्तानको काबुलबाट गैरकानुनीरुपमा पाकिस्तान हुँदै घर फर्कने क्रममा तीन महिनादेखि अलपत्र परेका तीन नेपाली कामदारलाई इस्लामाबादस्थित नेपाली दूतावासले उद्धार गरेर घर फिर्ता पठाएको छ ।
 
दूतावासले मोरङ विराटचोकका २७ वर्षीय विनोद दनुवार, धादिङ धादिङबेसीका ३८ वर्षीय सुकबहादुर सोनार र झापा गोलधापका ५६ वषीैय गंगाबहादुर गुरुङलाई उद्धार गरेको हो ।

मानव तस्करहरुले उनीहरुलाई अवैधानिक कागजात र उपायबाट दिल्ली ट्रान्जिट हुँदै करिब एक वर्षअघि काबुल पुर्याएका थिए।
 
काठमाडौ दिल्ली हुँदै काबुसम्म सञ्जाल बनाएर बसेका दलाल एकाएक सम्पर्कहीन बनेपछि र भने अनुसारको काम पाउने स्थिति नरहेपछि उनीहरु अफगान–पाक सीमा छिचोलेर घर फर्कने क्रममा थिए ।

तीनमध्ये विनोद र गंगाबहादुर गत जनवरी दोस्रो सातामा तोरखम नाकाबाट पाकिस्तान छिरेका थिए।
 
उनीहरु पाकिस्तान छिरेयता इस्लामाबादस्थित नेपाली दूतावासको संरक्षणमा थिए भने सुकबहादुर तोरखम नाका काट्दै गर्दा पाकिस्तानी सुरक्षा निकायको नियन्त्रणमा परेका थिए । कान्तिपुर दैनिकमा समाचार छ।

पाकिस्तानी सुरक्षा निकायले ४० दिन हिरासतमा राखेपछि सुकबहादुर गत जनवरी २९ मा इस्लामावादस्थित नेपाली दूतावासमा बुझाएको थियो ।