गुनासो नसुनेको भन्दै राजदूतलाई छुरा प्रहार गर्नेलाई नेपाल प्रहरीले काठमाडौं झिकायो

Posted on: March 05, 2018 | views: 1844

काठमाडौं ।

नेपाल प्रहरीले दुई वर्षअघि साउदी अरबस्थित नेपाली राजदूतावासमा तत्कालिन कार्यबाहक राजदूत आनन्दप्रसाद शर्मालाई छुरा प्रहार गर्ने व्यक्तिलाई नेपाल झिकाएको छ ।


छुरा प्रहार लगत्तै पक्राउ गरी स्थानीय प्रहरीले अनुसन्धान थालेको थियो । तर, त्यहाँको अदालतले नेपाली दुतावासभित्रको घटना भएको भन्दै नेपालस्थित अदालतले नै कारबाही अघि बढाउनु पर्ने फैसला गरेपछि राईलाई नेपाल डिपोर्ट गरिएको हो ।


उनलाई एयर अरेबियाको उडान नम्बर जी ९१५६ बाट आइतबार काठमाडौं ल्याइएको हो ।

यसअघि २ वैशाख ०७३ मा शर्मालाई मोरङको केराबारी–५ का ४७ वर्षीय लक्ष्मणबहादुर राईले शर्मालाई छुरा प्रहार गरेका थिए ।


राई वैदेशिक रोजगारीका क्रममा साउदी अरबस्थित एक कम्पनीमा कार्यरत थिए । त्यहाँ उनले सम्झौता अनुरुप तलब पाएका थिएनन् ।


त्यसबारे उनले पटकपटक दूतावासलाई जानकारी गराए पनि कुनै पहल नभएपछि राईले आक्रोसमा छुरा हानेको बताउँदै आएका छन् । आफ्नो समस्याको बारेमा कुनै सुनुवाई नभएपछि २ बैशाख ०७३ मा उनी दूतावासमा रहेको शर्माको कार्यकक्षमा पुगे ।


उनी चक्कु बोकेर त्यहाँ पुगेका थिए । र, छिर्ने वित्तिकै ढोका थुनेर शर्मामाथि आक्रमण गरेका थिए ।


घटनामा शर्माको हात र कुममा चोट लागेको थियो । उनी त्यहाँ केहीदिनको उपचारपछि सामान्य अवस्थामा फर्किएका थिए ।