महोत्तरीका यादव संयुक्त राष्ट्रसंघको प्रतिष्ठित अवार्ड बिजेता

Posted on: October 27, 2017 | views: 237

काठमाडौं ।

महोत्तरी जिल्ला घर भएका नेपाली नागरिक नवल यादवले प्रतिष्ठित सन् २०१७ को संयुक्त राष्ट्रसंघीय महासचिव अवार्ड प्राप्त गरेका छन् ।


न्यूयोर्कस्थित राष्ट्रसंघको सचिवालयमा शुक्रबार आयोजित एक समारोहका बीच राष्ट्रसंघका उपमहासचिव एमिना जे मोहम्मदले यादवलाई सो अवार्ड प्रदान गरेकी हुन् ।


संयुक्त राष्ट्रसंघले प्रत्येक वर्ष आफ्नो जिम्मेवारीभन्दा माथि उठेर योगदान पुर्‍याउने आफ्ना कर्मचारीलाई चार विधामा महासचिव अवार्ड प्रदान गर्ने गर्छ ।


महासचिवको सचिवालयले १२१ वटा मनोनयन प्राप्त गरेकोमा त्यसबाट प्रत्येक विधामा चार फाइनलिस्टहरुको छनोट गरेको थियो । यादवले ‘च्याम्पियन अफ द सस्टेनेबल डेभलपमेन्ट गोल्स विधामा परस्कार जितेका हुन् । नेपालमा सामुदायिक स्कुलहरुलाई सहयोग गरेकोमा यादवलाई सो पुरस्कार दिइएको बताइएको छ ।


महोत्तरी जिल्लाको तिमाकियामा जन्मेका यादव सन् २००३ को अप्रिलमा इन्टरनल अडिटरका रुपमा संयुक्त राष्ट्रसंघमा प्रवेश गरेका थिए ।यादव एक चार्टर्ड एकाउन्टेन्ट हुन् । उनले २५ वर्षसम्म नेपालको सरकारी कर्मचारीका रुपमा काम गरेका थिए ।


यादवले आफूले प्राथमिक शिक्षा अध्ययन गरेको स्थानमा सामुदायिक स्कुलहरुलाई सहयोग गरिरहेका छन् । आफ्नै पैसाबाट उनले विद्यालयको पूर्वाधारमा खर्च गर्दै आएका छन् ।